തമിഴ് നടൻ ആര്യ നായകനായി എത്തുന്ന ഏറ്റവും പുതിയ ചിത്രമാണ് ക്യാപ്റ്റൻ. ഒരു വമ്പൻ ആക്ഷൻ ത്രില്ലറായി തിയറ്ററിൽ എത്തുന്ന സിനിമയുടെ ട്രെയിലർ അണിയറ പ്രവർത്തകർ പുറത്തുവിട്ടു. അന്യഗ്രഹ ജീവികളെ വേട്ടയാടാൻ നിയോഗിക്കപ്പെടുന്ന ഒരു മിലിറ്ററി ഓഫീസറുടെ കഥയാണ് സിനിമയുടെ പശ്ചാത്തലമെന്ന് ട്രെയിലർ സൂചിപ്പിക്കുന്നു. ശക്തി സൗന്ദർ രാജൻ ആണ് ചിത്രത്തിന്റെ സംവിധായകൻ. മലയാളി താരം ഐശ്വര്യ ലക്ഷ്മിയാണ് സിനിമയിൽ നായികയായി എത്തിയിരിക്കുന്നത്. പഴയ തെന്നിന്ത്യൻ താരമായ സിമ്രാനും മുഖ്യവേഷം കൈകാര്യം ചെയ്യുന്നു.
വിശാൽ നായകനായ ആക്ഷൻ എന്ന ചിത്രത്തിലൂടെയാണ് ഐശ്വര്യ ലക്ഷ്മി തമിഴിൽ അരങ്ങേറ്റം കുറിച്ചത്. അതിനു ശേഷം ബ്രഹ്മാണ്ഡ തമിഴ് ചിത്രമായ പൊന്നിയിൻ സെൽവൻ, ജഗമേ തന്തിരം, പുത്തം പുതു കാലൈ വിടിയാതാ, ഗാർഗി എന്നിങ്ങനെ ഒരുപിടി ചിത്രങ്ങളിൽ താരം ഭാഗമായി. ക്യാപ്റ്റനിലെ ‘നിനൈവുകൾ’ എന്ന ഗാനത്തിന്റെ ലിറിക്കൽ വീഡിയോയും കഴിഞ്ഞ ഇടയ്ക്ക് അണിയറ പ്രവർത്തകർ പുറത്തു വിട്ടിരുന്നു. ഇമ്മാന്റെ സംഗീതത്തിൽ യുവൻ ശങ്കർ രാജയാണ് ഗാനം ആലപിച്ചിരിക്കുന്നത്.
ദി ഷോ പീപ്പിൾ, തിങ്ക് സ്റ്റുഡിയോസ് എന്നിവർ ചേർന്നാണ് സിനിമ നിർമ്മിച്ചിരിക്കുന്നത്. എസ്.യുവ ഛായാഗ്രഹണം നിർവഹിച്ചിരിക്കുന്ന ഈ ചിത്രത്തിന് സംഗീതമൊരുക്കിയത് ഡി. ഇമ്മനാണ്. ക്യാപ്റ്റന്റെ എഡിറ്റിംഗ് നിർവ്വഹിച്ചിരിക്കുന്നത് പ്രദീപ് ഇ.രാഘവാണ്. ഹരീഷ് ഉത്തമൻ, കാവ്യ ഷെട്ടി, ഗോകുൽ ആനന്ദ്, സുരേഷ് മേനോൻ, ഭരത് രാജ്, അമ്പുലി ഗോകുൽ എന്നിവരും ചിത്രത്തിൽ അണിനിരക്കുന്നു. സെപ്റ്റംബർ 8-നാണ് ചിത്രം തിയറ്ററിൽ എത്തുക.
Comments