ന്യൂഡൽഹി: ഇന്ത്യ 5ജി യുഗത്തിലേക്ക് ചുവടുറപ്പിക്കാൻ അധികകാലം വേണ്ട.സെപ്തംബർ തുടക്കത്തോടെ എയർടെൽ 5ജി സേവനങ്ങൾ ആരംഭിക്കുമെന്നാണ് റിപ്പോർട്ടുകൾ. 4ജിയേക്കാൾ പത്തിരട്ടി വേഗതയായിരിക്കും 5ജിയ്ക്ക ഉണ്ടാകുക. 5ജിയിലേക്ക് മാറുന്നതോടെ സൗകരങ്ങൾ ലഭിക്കാൻ പുതിയ ഫോണോ സിമ്മോ വാങ്ങേണ്ടി വരുമോ എന്നൊക്കെയാണ് പലരുടെയും സംശയങ്ങൾ.
ഇപ്പോൾ ഇറങ്ങുന്ന പല സ്മാർട്ട്ഫോണിലും 5ജി കണക്ടിവിറ്റിയുണ്ട്. ഒരേ പേരിലുള്ള ഫോണുകളിൽ 5ജി സപ്പോർട്ട് ചെയ്യുന്നതും അല്ലാത്തതുമായ വേർഷൻ ഇറങ്ങുന്നുണ്ട്.
ഫോണിൽ 5 ജി സപ്പോർട്ട് ചെയ്യുമോ എന്നറിയാൻ എളുപ്പമാണ്. അതിൽ മികച്ച മാർഗം ഫോണിന്റെ സവിശേഷതകൾ ഓൺലൈനിൽ പരിശോധിക്കുക എന്നതാണ്. വിശ്വസനീയമായ ടെക്ക് വെബ്സൈറ്റുകളിലോ ഫോൺ ബ്രാൻഡിന്റെ തന്നെ വെബ്സൈറ്റിലോ ഫോണിലെ കണക്റ്റവിറ്റി ഓപ്ഷനുകൾ സംബന്ധിച്ച വിവരങ്ങൾ ഉണ്ടാവും.
മറ്റൊരു വഴി ആൻഡ്രോയിഡ് ഫോൺ സെറ്റിങ്സിൽ സിം ആൻഡ് നെറ്റ്വർക്ക്സ് സൈറ്റിങ്സ് സന്ദർശിച്ചാൽ പ്രിഫേർഡ് നെറ്റ്വർക്ക് ടൈപ്പ് ഓപ്ഷനിൽ 2ജി, 3ജി, 4ജി, 5ജി, എന്നിങ്ങനെയുള്ള ഓപ്ഷനുകൾ കാണാം. ഫോണിൽ 5ജി കണക്റ്റിവിറ്റിയും കുറഞ്ഞത് 4ജി സിംകാർഡും ഉണ്ടെങ്കിൽ മാത്രമേ ഈ ലിസ്റ്റിൽ 5ജി കാണിക്കുകയുള്ളൂ. ഇപ്പോഴത്തെ 4ജി സിമ്മുകൾ ഉപയോഗിച്ച് തന്നെ 5ജി നെറ്റ് വർക്ക് ഉപയോഗിക്കാൻ കഴിയുമെന്നാണ് വിവരം.
മുമ്പ് 3ജിയിൽ നിന്ന് 4ജിയിലേക്ക് അപ്ഗ്രേഡ് ചെയ്തത് പോലെ സിംകാർഡ് 5ജിയിലേക്ക് അപ്ഗ്രേഡ് ചെയ്യേണ്ടി വരാൻ സാധ്യത കുറവാണ്. അഥവാ അങ്ങനെയൊരു ആവശ്യം വന്നാൽ അതാത് ടെലികോം സേവന ദാതാക്കൾ ഉപഭോക്താക്കളെ ബന്ധപ്പെടും.
Comments