ദക്ഷിണ കൊറിയൻ വാഹന നിർമ്മാതാക്കളായ ഹ്യൂണ്ടായി തങ്ങളുടെ പുതിയ വെന്യു എൻ ലൈൻ എസ്യുവി ഇന്ത്യൻ വിപണിയിൽ വെളിപ്പെടുത്തി. സെപ്റ്റംബർ 6-നാണ് വാഹനം ലോഞ്ച് ചെയ്യുന്നത്. മോഡലിനായുള്ള ബുംക്കിംഗ് കമ്പനി ആരംഭിച്ചിട്ടുണ്ട്. 2021 സെപ്റ്റംബറിൽ i20 N ലൈൻ ഹ്യൂണ്ടായി പുറത്തിറക്കിയിരുന്നു. അതിനു ശേഷം കമ്പനി അവതരിപ്പിക്കുന്ന രണ്ടാമത്തെ എൻ ലൈൻ മോഡലാണിത്. ടോക്കൺ തുകയായ 21,000 രൂപയ്ക്കാണ് വാഹനത്തിന്റെ ബുക്കിംഗ് സ്വീകരിച്ചു തുടങ്ങിയത്. ഉപഭോക്താക്കൾക്ക് ഹ്യൂണ്ടായ് ക്ലിക്ക് ടു ബൈ പ്ലാറ്റ്ഫോം വഴിയോ, രാജ്യത്തുടനീളമുള്ള ഹ്യുണ്ടായ് സിഗ്നേച്ചർ ഔട്ട്ലെറ്റുകൾ വഴിയോ പുതിയ വെന്യു എൻ ലൈൻ എസ്യുവി ഓൺലൈനായി മുൻകൂട്ടി ബുക്ക് ചെയ്യാം.
പുതിയ വെന്യു N ലൈൻ N6, N8 എന്നിങ്ങനെ രണ്ട് വേരിയന്റുകളിലായി ഉപഭോക്താക്കൾക്ക് ലഭിക്കുക. സ്റ്റാൻഡേർഡ് മോഡലുമായി താരതമ്യപ്പെടുത്തുമ്പോൾ ചില സൗന്ദര്യവർദ്ധക മെച്ചപ്പെടുത്തലുകൾ പുതിയ ഹ്യുണ്ടായി വെന്യു എൻ ലൈനിനുണ്ട്. സ്പോർട്ടിയർ പതിപ്പിൽ പുനർരൂപകൽപ്പന ചെയ്ത മുൻ വശം, റിയർ ബമ്പറുകൾ, എൻ ലൈൻ എംബ്ലത്തോടുകൂടിയ ഡാർക്ക് ക്രോമിൽ ഫിനിഷ് ചെയ്ത റേഡിയേറ്റർ ഗ്രിൽ, ബ്ലാക്ക് റൂഫ്, ഔട്ട്സൈറ്റ് റിയർ വ്യൂ മിററുകൾ, ലോവർ ബോഡി പാനലുകളിലും റൂഫ് റെയിലുകളിലും മിന്നുന്ന ചുവന്ന ഇൻസെർട്ടുകൾ, ഫ്രണ്ട് റെഡ് ബ്രേക്ക് കാലിപ്പറുകൾ, ഗ്രില്ലിൽ എൻ ലൈൻ ലോഗോ, ഫ്രണ്ട് ഫെൻഡറുകൾ, ബൂട്ട്, N ലോഗോയുള്ള വ്യതിരിക്തമായ 16 ഇഞ്ച് അലോയ് വീലുകൾ, സ്പോയിലർ, ഇരട്ട-ടിപ്പ് എക്സ്ഹോസ്റ്റ് എന്നിവയാണ് പുതിയ വെന്യു എൻ ലൈൻ എസ്യുവിയുടെ ആകർഷണ ഘടകങ്ങൾ.
വഹനത്തിന്റെ ക്യാബിനിനുള്ളിലും സ്പോർട്ടിയർ തീം കാണാം. ഗിയർ നോബ്, സെന്റർ കൺസോൾ, ഡാഷ്ബോർഡ് എന്നിവയിൽ ചുവപ്പ് നിറമാണ്. സീറ്റിലെ ഫ്രഷ് ബ്ലാക്ക് അപ്ഹോൾസ്റ്ററി, ഗിയർ സ്റ്റിക്കിന് എൻ ലോഗോ ഉള്ള ചുവന്ന സ്റ്റിച്ചിംഗും പൈപ്പിംഗും ലഭിക്കും. ഡോർ ട്രിമ്മുകളിലും കോൺട്രാസ്റ്റ് റെഡ് സ്റ്റിച്ചിംഗ് ഉണ്ട്. വെന്യു എൻ ലൈനിൽ മുന്നിലും പിന്നിലും ഡിസ്ക് ബ്രേക്കുകൾ ഉൾപ്പെടെ 30 ഫീച്ചറുകൾ ഉണ്ടാകും. ഇതുകൂടാതെ, അലക്സ, ഗൂഗിൾ വോയ്സ് അസിസ്റ്റന്റുകളുള്ള ഹോം-ടു-കാർ പ്രവർത്തനവും ഹ്യുണ്ടായ് വാഗ്ദാനം ചെയ്യും.
ആൻഡ്രോയിഡ് ഓട്ടോ കണക്റ്റിവിറ്റിയുള്ള 8.0 ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, ബോസ് ഓഡിയോ സിസ്റ്റം, ബ്ലൂലിങ്ക് കണക്റ്റഡ് കാർ ടെക്, ഇലക്ട്രിക് സൺറൂഫ് മുതലായവയും വാഹനത്തിന് ലഭിക്കുന്നു. 1.0L ടർബോ പെട്രോൾ എഞ്ചിനും ഡിസിടി ഗിയർബോക്സും വാഹനത്തിന് നൽകുന്നു. മോട്ടോർ 120 ബിഎച്ച്പി പരമാവധി കരുത്ത് പുറപ്പെടുവിക്കുന്നു. ടർബോ പെട്രോൾ മോട്ടോറിനൊപ്പം 7 സ്പീഡ് ട്വിൻ ക്ലച്ച് DCT ഓട്ടോമാറ്റിക് ഗിയർബോക്സും ലഭിക്കും. വാഹനം അഞ്ച് കളർ ഓപ്ഷനുകളിൽ ലഭ്യമാകും.
