ദുബായ്: ഏഷ്യാ കപ്പ് ക്രിക്കറ്റിലെ ഇന്ത്യ- പാകിസ്താൻ പോരാട്ടത്തിന് മുന്നോടിയായി പരിശീലനത്തിനിടെ സൗഹൃദം പങ്കു വെച്ച് ഇരു ടീമുകളിലെയും കളിക്കാർ. പരിക്കേറ്റ് വിശ്രമിക്കുന്ന പാകിസ്താൻ പേസർ ഷഹീൻ അഫ്രീദിയും മുൻ ഇന്ത്യൻ ക്യാപ്ടൻ വിരാട് കോഹ്ലിയും തമ്മിലുള്ള സംഭാഷണം സാമൂഹിക മാദ്ധ്യമങ്ങളിൽ വൈറൽ ആകുന്നു.
അഫ്രീദിയുടെ അടുത്തേക്ക് ചെല്ലുന്ന വിരാട് കോഹ്ലി, ഹസ്തദാനത്തിന് ശേഷം അദ്ദേഹത്തോട് പരിക്ക് ശ്രദ്ധിക്കണമെന്ന് ഉപദേശിക്കുന്നു. തുടർന്ന് വേഗം സുഖം പ്രാപിക്കട്ടെയെന്ന് ആശംസിക്കുകയും ചെയ്യുന്നു. താങ്കളുടെ മടങ്ങി വരവിനായി ഞങ്ങളും പ്രാർത്ഥിക്കുകയാണ്. വീണ്ടും ഫോമിൽ കാണാൻ ആഗ്രഹിക്കുന്നുവെന്ന് ഷഹീൻ മറുപടിയും നൽകുന്നു. പാകിസ്താൻ ക്രിക്കറ്റ് ബോർഡാണ് വീഡിയോ പങ്ക് വെച്ചിരിക്കുന്നത്.
ഓഗസ്റ്റ് 28നാണ് ഏഷ്യാ കപ്പിലെ ഇന്ത്യ- പാകിസ്താൻ പോരാട്ടം. നാളെ നടക്കുന്ന ശ്രീലങ്ക- അഫ്ഗാനിസ്ഥാൻ മത്സരത്തോടെയാണ് ടൂർണമെൻ്റ് ആരംഭിക്കുന്നത്. ട്വൻ്റി 20 ഫോർമാറ്റിലാണ് ഇത്തവണത്തെ മത്സരങ്ങൾ. ഏകദിന ഫോർമാറ്റിൽ നടന്ന 2018 ഏഷ്യാ കപ്പിൽ ഇന്ത്യയാണ് ചാമ്പ്യൻഷിപ്പ് നേടിയത്. ഫൈനലിൽ ബംഗ്ലാദേശിനെ 3 വിക്കറ്റിന് പരാജയപ്പെടുത്തിയായിരുന്നു ഇന്ത്യയുടെ കിരീട നേട്ടം. കഴിഞ്ഞ ടൂർണമെൻ്റിൽ രണ്ട് തവണ ഏറ്റുമുട്ടിയപ്പോഴും ഇന്ത്യ പാകിസ്താനെതിരെ തകർപ്പൻ വിജയം നേടിയിരുന്നു.
