വയനാട് : സ്‌കൂൾ വിദ്യാർത്ഥിനികളെ അതിസാഹസികമായി ജീപ്പിൽ നിർത്തിക്കൊണ്ട് പോകുന്നതിന്റെ വീഡിയോ പുറത്ത്. വയനാട് അമ്പലവയലിലാണ് സംഭവം. സ്‌കൂൾ കഴിഞ്ഞ് വീട്ടിലേക്ക് പോകുന്ന വിദ്യാർത്ഥിനികളെയാണ് ജീപ്പിൽ നിർത്തിക്കൊണ്ട് യാത്ര ചെയ്യിപ്പിച്ചത്. വീഡിയോ വൈറലായതോടെ സംഭവത്തിൽ അന്വേഷണം ആരംഭിച്ചു.
വ്യാഴാഴ്ച വൈകീട്ടായിരുന്നു സാഹസിക യാത്ര. വേഗത്തിൽ പോകുന്ന ജീപ്പിന് പിന്നിലാണ് വിദ്യാർത്ഥിനികൾ പിടിച്ച് തൂങ്ങി നിൽക്കുന്നത്. വീഡിയോ സമൂഹമാദ്ധ്യമങ്ങളിൽ പ്രചരിച്ചതോടെ ജീപ്പ് മോട്ടോർ വാഹനവകുപ്പ് കസ്റ്റഡിയിലെടുത്തു. സംഭവത്തിൽ വിശദമായ അന്വേഷണവും ആരംഭിച്ചു. രേഖകൾ പരിശോധിച്ച ശേഷം തുടർനടപടികൾ എടുക്കുമെന്ന് ബത്തേരി ആർടിഒ അറിയിച്ചു.
