ലക്നൗ : ഭാര്യയുടെ തല്ലും ബഹളവും സഹിക്കാനാവാതെ വന്നതോടെ മരത്തിന് മുകളിലേക്ക് താമസം മാറ്റി ഗൃഹനാഥൻ. 80 അടി പൊക്കമുള്ള ഈന്തപ്പനയുടെ മുകളിലാണ് ഒരു മാസമായി യുവാവ് താമസിക്കുന്നത്. ഉത്തർപ്രദേശിലെ മൗ ജില്ലയിലാണ് സംഭവം. കൊപ്പഗഞ്ജ് സ്വദേശിയായ രാം പ്രവേശാണ് ഈന്തപ്പനയുടെ മുകളിൽ താമസമാക്കിയത്.
കഴിഞ്ഞ ആറ് മാസമായി ഇയാൾ ഭാര്യയുമായി നിരന്തരം വഴക്കിടാറുണ്ടായിരുന്നു. ഭാര്യ തന്നെ എപ്പോഴും മർദ്ദിക്കുകയും വഴക്ക് പറയുകയും ചെയ്യുമെന്നാണ് യുവാവ് പറയുന്നത്. ഭാര്യയുമൊത്തുളള തർക്കങ്ങൾ വർദ്ധിച്ചതോടെയാണ് മരത്തിന് മുകളിൽ താമസമാക്കാൻ യുവാവ് തീരുമാനിച്ചത്. തുടർന്ന് 80 അടി നീളമുളള ഈന്തപ്പനയുടെ മുകളിൽ കയറി താമസമാക്കുകയായിരുന്നു.
വീട്ടുകാർ കയറിൽ കെട്ടി ഭക്ഷണം മരത്തിന് മുകളിലേക്ക് എത്തിക്കും. പ്രാഥമികാവശ്യങ്ങൾക്കായി രാത്രി നേരത്താണ് ഇയാൾ മരത്തിൽ നിന്ന് താഴെയിറങ്ങാറുള്ളതെന്ന് ആളുകൾ പറയുന്നു. താഴെയിറങ്ങി വീട്ടിലേക്ക് വരാൻ എല്ലാവരും നിർബന്ധിച്ചെങ്കിലും യുവാവ് അനുസരിച്ചില്ല. തുടർന്ന് ഇവർ പോലീസിനെ വിവരം അറിയിക്കുകയായിരുന്നു.
അതേസമയം ഇയാൾക്കെതിരെ പരാതിയുമായി നിരവധി പേർ എത്തിയിട്ടുണ്ടെന്ന് ഗ്രാമത്തലവൻ പറയുന്നു. ഈന്തപ്പനയുടെ മുകളിൽ ഇരുന്ന് മറ്റ് വീടുകളിൽ നടക്കുന്ന സംഭവങ്ങൾ നിരീക്ഷിക്കലാണ് ഇയാളുടെ പ്രധാന ജോലി. ഇത് തങ്ങളുടെ സ്വകാര്യത ഇല്ലാതാക്കുന്നുവെന്ന് പരാതിപ്പെട്ടുകൊണ്ട് നിരവധി സ്ത്രീകൾ രംഗത്തെത്തിയിട്ടുണ്ട്.
