നാല് ഭാഷകളിലായി പുറത്തിറക്കുന്ന വമ്പൻ പ്രൊജക്ട് പ്രഖ്യാപിച്ച് നടൻ മോഹൻലാൽ. പാൻ ഇന്ത്യ ലെവലിൽ ‘ഋഷഭ’ എന്ന ചിത്രമാണ് പുറത്തിറങ്ങുന്നത്. നന്ദകുമാർ സംവിധാനം ചെയ്യുന്ന ചിത്രം ഹിന്ദി, മലയാളം, തമിഴ്, തെലുങ്ക് ഭാഷകളിലായാണ് പ്രേക്ഷകർക്ക് മുന്നിലേക്ക് എത്തുക.
എവിഎസ് സ്റ്റുഡിയോസിന്റെ ബാനറിൽ അഭിഷേക് വ്യാസ്, പ്രവീർ സിംഗ്, ശ്യാം സുന്ദർ എന്നിവരാണ് ചിത്രം നിർമ്മിക്കുന്നത്. ആവേശകരമായ ആക്ഷൻ-ഇമോഷൻ രംഗങ്ങളുള്ള ചിത്രം വൻ ക്യാൻവാസിലാണ് ഒരുങ്ങുന്നത്. അച്ഛൻ-മകൻ ബന്ധമാണ് ചിത്രത്തിൽ എടുത്തുപറയുന്നത്. ചിത്രത്തിന്റെ കരാറിൽ ഒപ്പിടുന്നതിന്റെ ഭാഗമായി മോഹൻലാൽ ഇപ്പോൾ ദുബായിലാണ്.
സിനിമ ചിത്രീകരണം ആരംഭിക്കുന്നതിന്റെ ആവേശത്തിലാണ് താനെന്ന് മോഹൻലാൽ പറഞ്ഞു. സ്ക്രിപ്റ്റ് കേട്ട നിമിഷം തന്നെ ഋഷഭ എന്ന ആശയത്തിലേക്ക് ഞാൻ ആകർഷിക്കപ്പെട്ടു. അച്ഛൻ-മകൻ ബന്ധത്തിന്റെ ദൃഢത തെളിയിക്കുന്ന ആവേശകരമായ ഡ്രാമയാണിത്. ആദ്യ സിനിമയിൽ തന്നെ എവിഎസ് സ്റ്റുഡിയോയുമായി സഹകരിക്കുന്നതിൽ താൻ വളരെയധികം സന്തോഷിക്കുന്നുവെന്നും മോഹൻലാൽ വ്യക്തമാക്കി.
Comments