എറണാകുളം: മഴ ശക്തമായ സാഹചര്യത്തിൽ എറണാകുളം ഇടമലയാർ ഡാമിൽ റെഡ് അലർട്ട്. മഴ കനത്തതോടെ ഡാമിൽ ജലനിരപ്പ് ഉയരുന്നതിനാലാണ് മുന്നറിയിപ്പ് നൽകിയിരിക്കുന്നത്. നിലവിൽ ഡാമിലെ ജലനിരപ്പ് 163.5 അടിയാണ്. 164 അടിയാണ് ഡാമിലെ പരമാവധി സംഭരണ ശേഷി. ജലനിരപ്പ് ഉയരുന്ന സാഹചര്യമാണെങ്കിൽ അണക്കെട്ടിന്റെ ഷട്ടറുകൾ തുറക്കും.
ഡാമിന്റെ വൃഷ്ടി പ്രദേശത്ത് ശക്തമായ മഴയാണ് പെയ്യുന്നത്. കൂടാതെ,വരും മണിക്കൂറുകളിൽ എറണാകുളം അടക്കമുള്ള ജില്ലകളിൽ ശക്തമായ മഴ പെയ്യും എന്ന് മുന്നിയിപ്പ് വന്നതോടെയാണ് ഇടമലയാർ ഡാമിൽ റെഡ് അലർട്ട് പ്രഖ്യാപിച്ചത്. റൂൾ ലെവൽ പ്രകാരം ഡാമിലെ ജലനിരപ്പ് 164 അടി എത്തിയാൽ ഷട്ടറുകൾ തുറന്ന് അധിക ജലം പുറത്തേക്ക് ഒഴുക്കും.
അതേസമയം, പെരിയാർ നദിയിൽ ജലനിരപ്പ് താഴ്ന്ന നിലയിലാണുള്ളത്. കാലടിയിൽ 1.415 മീറ്റർ, മാർത്താണ്ഡവർമ പാലത്തിന് സമീപം 0.855 മീറ്റർ, മംഗലപ്പുഴയിൽ 0.80 മീറ്റർ എന്നിങ്ങനെയാണ് ജലനിരപ്പ്. പെരിയാർ നദിയുടെ കൈവഴിയായ ഇടമലയാറിൽ അയ്യമ്പുഴയ്‌ക്കും ഭൂതത്താൻകെട്ടിനും ഇടയിൽ എണ്ണക്കലിലാണ് ഇടമലയാർ ഡാമിന്റെ സ്ഥാനം.
