ചരിത്ര വിജയമായ എസ് എസ് രാജമൗലി ചിത്രം ആർ ആർ ആർ ഗണേശ ചതുർത്ഥി ആഘോഷവേളയിലും ട്രെൻഡിംഗ് ആകുന്നു. ചിത്രത്തിൽ രാം ചരൺ അവതരിപ്പിച്ച കഥാപാത്രത്തിന്റെ മാതൃകയിലുള്ള ഗണേശ വിഗ്രഹങ്ങൾക്ക് ആവശ്യക്കാർ ഏറെയാണ്.
കൊമരം ഭീം, അല്ലൂരി സീതാരാമ രാജു എന്നിവരുടെ ജീവിതത്തിൽ നിന്നും പ്രചോദനം ഉൾക്കൊണ്ട് പകുതി വസ്തുതയും പകുതി ഫാൻ്റസിയും കലർത്തി നിർമ്മിച്ച ചിത്രമാണ് ആർ ആർ ആർ. ചിത്രത്തിന്റെ അവസാന ഭാഗത്ത് രാം ചരൺ അവതരിപ്പിക്കുന്ന കഥാപാത്രം ശ്രീരാമ വേഷത്തിന് സമാനമായ വേഷവിധാനങ്ങളുമായി സംഘട്ടന രംഗങ്ങളിൽ പ്രത്യക്ഷപ്പെടുന്നുണ്ട്. ഇതേ മാതൃകയിൽ ആവിഷ്കരിച്ചിരിക്കുന്ന ഗണേശ വിഗ്രഹങ്ങളാണ് ശ്രദ്ധേയമാകുന്നത്.
ചിത്രത്തിൽ ജൂനിയർ എൻ ടി ആർ അവതരിപ്പിച്ച കഥാപാത്രം കടുവയുമായി പോരാടുന്ന രംഗമുണ്ട്. ഇതേ മാതൃകയിലും ഗണേശ വിഗ്രഹങ്ങൾ നിർമ്മിച്ചിട്ടുണ്ട്. ഇത്തരം വിഗ്രഹങ്ങൾക്ക് പതിനായിരം രൂപ വരെ വില ലഭിക്കുന്നതായി ശിൽപ്പികൾ പറയുന്നു. രാജമൗലിയുടെ മുൻ ചിത്രമായ ബാഹുബലിയിലെ പ്രഭാസ് അവതരിപ്പിച്ച കഥാപാത്രത്തിന്റെ മാതൃകയിലുള്ള ഗണേശ വിഗ്രഹങ്ങൾ മുൻവർഷങ്ങളിൽ ട്രെൻഡിംഗ് ആയിരുന്നു.
Comments