ദുബായ്: ഏഷ്യാകപ്പ് ടി20 ക്രിക്കറ്റിൽ ടീം ഇന്ത്യ ഇന്ന് രണ്ടാം മത്സരത്തിനിറങ്ങുന്നു. ഹോങ്കോംഗാണ് എതിരാളി. ആദ്യ പോരാട്ടത്തിൽ പാകിസ്താനെ അഞ്ചുവിക്കറ്റിന് തകർത്ത ടീം ഇന്ത്യ മികച്ച ഫോമിലാണ്. മത്സരം രാത്രി 7.30ന് ദുബായ് അന്താരാഷ്ട്ര സ്റ്റേഡിയത്തിൽ ആരംഭിക്കും. ആതിഥേയരായ യുഎഇയെ യോഗ്യതാ മത്സരത്തിൽ തകർത്താണ് ഹോങ്കോംഗ് ഏഷ്യാകപ്പിന് യോഗ്യത നേടിയത്.
പാകിസ്താനെ തോൽപ്പിച്ചതോടെ സൂപ്പർ ഫോർ ഉറപ്പാക്കിയ ഇന്ത്യ ഹോങ്കോംഗിനെതിരെ മികച്ച പ്രകടനം ആവർത്തിക്കാനുള്ള തയ്യാറെടുപ്പിലാണ്. മൂന്നാം തവണയാണ് ഇന്ത്യ ഹോങ്കോംഗിനെ നേരിടാൻ ഇറങ്ങുന്നത്. ടി20യിൽ ഇരുടീമുകളും ഏറ്റുമുട്ടുന്നത് ആദ്യമാണെന്ന പ്രത്യേകതയുമുണ്ട്. മുമ്പ് രണ്ടു തവണയും ഏകദിന പോരാട്ടമാണ് നടന്നത്. രണ്ടിലും ഇന്ത്യയ്ക്കായിരുന്നു ജയം. 2008ലാണ് ആദ്യമായി ഹോങ്കോംഗുമായി ഇന്ത്യ ഏറ്റുമുട്ടിയത്. രണ്ടാമത്തെ പോരാട്ടം 2018ലായിരുന്നു.
മികച്ച ഫോമിലുള്ള ബൗളർമാരും ബാറ്റർമാരുമാണ് ടീം ഇന്ത്യയുടെ കരുത്ത്. വിരാട് കോഹ്ലിയും ഹാർദ്ദിക് പാണ്ഡ്യയും ഉശിരൻ ഫോമിലേയ്ക്ക് ഉയർന്നതോടെ ആരാധകർ ആവേശത്തിലാണ്. പാകിസ്താനെതിരെ അവസാന ഓവറിലെ ആവേശം കെടാതെ സമൂഹ മാദ്ധ്യമങ്ങളിലൂടെ ആഘോഷിക്കുകയാണ് ക്രിക്കറ്റ് ആരാധകർ.
