ബീജിംഗ്: ഹോളിവുഡിലെ ഏറ്റവും പുതിയ ആനിമേറ്റഡ് ബ്ലോക്ക്ബസ്റ്റർ മിനിയൻസ് ദി റൈസ് ഓഫ് ഗ്രു എന്ന ചിത്രം ചൈനയിൽ പ്രദർശിപ്പിക്കുന്നതിന് മുൻപ് ക്ലൈമാക്സിൽ മാറ്റം വരുത്തിയെന്ന് ആക്ഷേപം. ചിത്രത്തിലെ വില്ലനായ വൈൽഡ് നക്കിൾസ് പിടിയിലാവുകയും 20 വർഷം ജയിൽ വാസം അനുഭവിക്കുകയും ചെയ്യുന്ന സിനിമയുടെ അവസാന ഭാഗം നീക്കം ചെയ്ത് മറ്റൊരുഭാഗം കൂട്ടിച്ചേർത്തെന്ന് സിംഗപ്പുർ പോസ്റ്റ് റിപ്പോർട്ട് ചെയ്തു.
സിനിമയുടെ അവസാന ഭാഗം സർക്കാർ നയങ്ങൾക്ക് അനുകൂലമായി തിരുത്തുകയാണ് ചെയ്തിരിക്കുന്നത്. സിനിമയിൽ മൂന്ന് കുട്ടികളെ ഉയർത്തിക്കൊണ്ടുവരാൻ പ്രയത്‌നിക്കുന്ന വ്യക്തിയാണ് നായകൻ. ഇയാളുടെ ജീവിതം ഇതിനായി സമർപ്പിതവുമാണ്. എന്നാൽ ഈ ഭാഗം ഷീ ജിൻപിംഗിന്റെ മൂന്ന് കുട്ടി നയത്തിന് എതിരാണെന്ന കണ്ടെത്തലിനെ തുടർന്നാണ് വെട്ടിമുറിച്ചത്.
ജൂലൈ ഒന്നിനാണ് മിനയൻസ് ദ റൈസ് ഓഫ് ഗ്രൂ എന്ന ചിത്രം യുഎസിൽ തിയറ്ററുകളിലെത്തിയത്. കുറഞ്ഞ നാളുകൾക്കുളളിൽ അനിമേഷൻ ചലച്ചിത്ര പ്രേമികൾക്കിടയിൽ ചിത്രം ഹിറ്റാകുകയും ചെയ്തു. എന്നാൽ ഇപ്പോൾ ചൈനയിൽ മാത്രം മറ്റൊരു ക്ലൈമാക്‌സിലാണ് ചിത്രം പ്രദർശിപ്പിക്കുന്നത്. ചൈനയുടെ ട്വിറ്റർ പ്ലാറ്റ്‌ഫോമായ വെയ്‌ബോയിൽ ഇത് ചൂടൻ ചർച്ചയാകുകയും ചെയ്തു.
യൂണിവേഴ്‌സൽ പിക്‌ചേഴ്‌സോ ചൈനയിലെ വിതരണക്കാരോ ക്ലൈമാക്സിൽ മാറ്റം വരുത്തിയതിന് ഉത്തരവാദികളാണെന്ന് കരുതുന്നില്ലെന്ന് ഹോളിവുഡ് എഴുത്തുകാരൻ ക്രിസ് ഫെന്റോൺ പറഞ്ഞു. 70 കളിൽ വളരുന്ന 12 വയസുകാരനായ കുട്ടിയുടെ കഥയാണിത്. ക്ലൈമാക്‌സിലെ മാറ്റത്തെക്കുറിച്ച് യൂണിവേഴ്‌സൽ പിക്‌ചേഴ്‌സും പ്രതികരിക്കാൻ തയ്യാറായിട്ടില്ല.
