തിരുവനന്തപുരം: സംസ്ഥാനത്ത് ഇനി ഷവർമ്മ തയ്യാറാക്കാൻ ലൈസൻസ് നിർബന്ധം. ഷവർമ്മ നിർമ്മിക്കുന്നതുമായി ബന്ധപ്പെട്ട് സർക്കാർ പുറത്തിറക്കിയ മാർഗ്ഗ നിർദ്ദേശങ്ങളിലാണ് ഇക്കാര്യങ്ങൾ ഉള്ളത്. ലൈസൻസില്ലെങ്കിൽ 5 ലക്ഷം രൂപ പിഴയും, ആറ് മാസം തടവും ശിക്ഷയായി ലഭിക്കുമെന്നും സർക്കാർ മാർഗ്ഗനിർദ്ദേശത്തിലുണ്ട്.
സംസ്ഥാനത്ത് ഷവർമ്മ കഴിച്ച് ഭക്ഷ്യവിഷബാധയേൽക്കുന്ന സംഭവങ്ങൾ വർദ്ധിക്കുന്ന സാഹചര്യത്തിലാണ് സർക്കാർ മാർഗ്ഗ നിർദ്ദേശം പുറപ്പെടുവിച്ചത്. തുറസ്സായ സ്ഥലത്തും പൊടി നിറഞ്ഞ അന്തരീക്ഷത്തിലും ഷവർമ്മ പാകം ചെയ്യരുത്. ഉപയോഗിക്കുന്ന ഇറച്ചിയുടെ കാര്യത്തിലും ശ്രദ്ധവേണം. നാല് മണിക്കൂറിന് ശേഷം ബാക്കി വന്ന ഇറച്ചി ഷവർമ്മ തയ്യാറാക്കാനായി ഉപയോഗിക്കരുത്. പാഴ്സലായാണ് നൽകുന്നത് എങ്കിൽ കവറിന് പുറത്ത് തിയതി, സമയം എന്നിവയും വാങ്ങിക്കഴിഞ്ഞാൽ ഒരു മണിക്കൂറിനുള്ളിൽ ഉപയോഗിക്കണമെന്ന കാര്യവും കൃത്യമായി രേഖപ്പെടുത്തണമെന്നും സർക്കാരിന്റെ മാർഗ്ഗ നിർദ്ദേശത്തിൽ വ്യക്തമാക്കുന്നു.
അടുത്തിടെ കാസർകോട് ഷവർമ്മയിൽ നിന്നും ഭക്ഷ്യവിഷബാധയേറ്റ് വിദ്യാർത്ഥിനി മരിച്ചിരുന്നു. ഇതിന് പിന്നാലെ നിരവധി പേർ ഭക്ഷ്യവിഷബാധയേറ്റ് ചികിത്സ തേടിയിരുന്നു. ഇതെല്ലാം പരിഗണിച്ചാണ് മാർഗ്ഗ നിർദ്ദേശങ്ങൾ പുറത്തിറക്കാൻ സർക്കാർ തീരുമാനിച്ചത്.
Comments