ആരാധകരുടെ കാത്തിരിപ്പിന് അവസാനം കുറിച്ച് കൊണ്ട് സുരേഷ് ഗോപി ചിത്രം പാപ്പന്റെ ഒടിടി റിലീസ് തീയതി പ്രഖ്യാപിച്ചു. ബോക്സ് ഓഫീസിൽ സുരേഷ് ഗോപിക്ക് വമ്പൻ തിരിച്ചുവരവ് നൽകിയ ചിത്രം ജൂലൈ 29 നാണ് തിയേറ്ററുകളിൽ എത്തിയത്. തിയേറ്ററുകളിൽ എത്തിയ അന്നു മുതൽ ആരാധകർ ചിത്രത്തിന്റെ ഒടിടി റിലീസിനായുള്ള കാത്തിരിപ്പിലാണ്. സീ 5 ലൂടെ ആയിരിക്കും ചിത്രം എത്തുകയെന്ന വിവരം മുമ്പ് പുറത്ത് വന്നിരുന്നു.
ഇപ്പോഴിതാ ചിത്രത്തിന്റെ ഒടിടി റിലീസ് തീയതി ഔദ്യോഗികമായി പ്രഖ്യാപിച്ചിരിക്കുകയാണ് അണിയറ പ്രവർത്തകർ. ഉത്രാട ദിനമായ സെപ്തംബർ 7 നാണ് ചിത്രത്തിന്റെ ഒടിടി റിലീസ്. പാപ്പന്റെ ഒടിടി സാറ്റ്ലൈറ്റ് അവകാശങ്ങൾ സ്വന്തമാക്കിയിരിക്കുന്നത് സീ കേരളമാണ്.
3.16 കോടി രൂപയായിരുന്നു റിലീസ് ദിനത്തിൽ കേരളത്തിൽ നിന്ന് പാപ്പൻ സ്വന്തമാക്കിയത്. ഒരാഴ്ചക്കുള്ളിൽ ഇത് 17.85 കോടി ആയി ഉയർന്നു.വിദേശ, ഇതര സംസ്ഥാന റിലീസുകൾ സംഭവിച്ചതിന് ശേഷം 10 ദിവസത്തെ ആഗോള ഗ്രോസ്, നിർമ്മാതാക്കൾ പുറത്തുവിട്ട കണക്ക് അനുസരിച്ച് 31.43 കോടി ആയിരുന്നു.ആഗോള ബോക്സ് ഓഫീസിലെ ഗ്രോസും ഒടിടി, സാറ്റലൈറ്റ് അവകാശങ്ങളിലൂടെ നേടിയ തുകയും ചേർത്ത് ചിത്രം 50 കോടി ക്ലബ്ബിൽ ഇടംപിടിച്ചതായി നിർമ്മാതാക്കൾ മുമ്പ് അറിയിച്ചിരുന്നു.
ജോഷിയുടെ സംവിധാത്തിൽ സുരേഷ് ഗോപി കേന്ദ്ര കഥാപാത്രമായി എത്തിയ ക്രൈം ത്രില്ലർ ചിത്രമാണ് പാപ്പൻ. ഒരിടവേളയ്ക്ക് ശേഷം സുരേഷ് ഗോപി പോലീസ് വേഷത്തിൽ എത്തിയ ചിത്രം കൂടെയാണ് ഇത്.പൊറിഞ്ചു മറിയം ജോസിനു ശേഷം ജോഷിയുടെ സംവിധാനത്തിൽ എത്തിയ ചിത്രവുമാണ് പാപ്പൻ. ഗോകുൽ സുരേഷും ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഇരുവരും ആദ്യമായി ഒരുമിച്ചെത്തുന്ന ചിത്രം എന്ന പ്രത്യേകതയുമുണ്ട്.
