ഇന്ത്യയിലെ ഏറ്റവും മൂല്യമേറിയ ദമ്പതികളാണ് ക്രിക്കറ്റ് താരം വിരാട് കോഹ്ലിക്കും ഭാര്യ നടി അനുഷ്ക ശർമ്മയും. കോടികൾ വിലപ്പിടിപ്പുളള സ്വത്തുകളാണ് ദമ്പതികൾക്ക് സ്വന്തമായുളളത്. മുംബൈയിൽ അറബിക്കടലിനെ അഭിമുഖീകരിക്കുന്ന വിശാലമായ വീടുണ്ട്. ഹരിയാനയിലെ ഗുരുഗ്രാമിൽ ഏകദേശം 80 കോടി രൂപ വിലമതിക്കുന്ന ബംഗ്ലാവും താര ദമ്പതികൾക്കുണ്ട്.
സെലിബ്രിറ്റി ദമ്പതികൾ മറ്റൊരു സ്വത്ത്കൂടി വാങ്ങിയതാണ് ഇപ്പോൾ വാർത്തയായിരിക്കുന്നത്. കോഹ്ലിയും അനുഷ്കയും മുംബൈയ്ക്ക് സമീപമുള്ള അലിബാഗിൽ എട്ട് ഏക്കർ ഭൂമി സ്വന്തമാക്കി. 19.24 കോടി രൂപ നൽകിയാണ് 8 ഏക്കർ സ്ഥലം സ്വന്തമാക്കിയത്. നികുതിയായി സർക്കാർ ട്രഷറിയിൽ 1.15 കോടി രൂപയും അടച്ചിട്ടുണ്ട്. ഒരു ഫാം ഹൗസ് നിർമ്മിക്കുന്നതിനായാണ് താരദമ്പതികൾ സ്ഥലം വാങ്ങിയതെന്ന് സൂചനയുണ്ട്.
ക്രിക്കറ്റ് താരത്തിന്റെ മൂത്ത സഹോദരൻ വികാസ് കോഹ്ലി ഓഗസ്റ്റ് 30ന് ഇടപാട് പൂർത്തിയാക്കി. 2017ൽ വിവാഹിതരായ കോഹ്ലിയും ശർമ്മയും അതാത് തൊഴിലുകളിൽ ഏറ്റവും കൂടുതൽ പ്രതിഫലം വാങ്ങുന്ന സെലിബ്രിറ്റികളാണ്. ബിസിസിഐയിൽ നിന്ന് പ്രതിവർഷം 7 കോടി രൂപ സമ്പാദിക്കുന്ന മുൻ ഇന്ത്യൻ ക്യാപ്റ്റൻ, ഐപിഎല്ലിൽ ഏറ്റവും കൂടുതൽ പ്രതിഫലം വാങ്ങുന്ന ക്രിക്കറ്റ് കളിക്കാരിൽ ഒരാളാണ്. ഐപിഎല്ലിൽ നിന്ന് ഇതുവരെ 158 കോടി രൂപയിലധികം സമ്പാദിച്ചു.
അനുഷ്ക ഓരോ സിനിമയ്ക്കും 15 കോടി മുതൽ 30 കോടി രൂപ വരെയാണ് പ്രതിഫലം വാങ്ങുന്നത്. ഇന്ത്യൻ വനിതാ ക്രിക്കറ്റ് ടീം ബൗളർ ജുലൻ ഗോസ്വാമിയുടെ ജീവചരിത്രമായ ചക്ദ എക്സ്പ്രസിലൂടെ അവർ നാല് വർഷത്തിന് ശേഷം ബിഗ് സ്ക്രീനിലേക്ക് മടങ്ങിയെത്താനിരിക്കുകയാണ്.
വിവിധ ബ്രാൻഡുകളിൽ നിന്നായി ഇരുവരും പരസ്യ വരുമാനത്തിൽ വലിയ തുകയാണ് സമ്പാദിക്കുന്നത്. കോഹ്ലിയുടെയും അനുഷ്കയുടെയും മൊത്തം ആസ്തി 1250 കോടി രൂപയോളം വരും. മേൽപ്പറഞ്ഞ പ്രോപ്പർട്ടികൾക്ക് പുറമെ ബെന്റ്ലി കോണ്ടിനെന്റൽ ജിടി, ബെന്റ്ലി ഫ്ലയിംഗ് സ്പർ, ബിഎംഡബ്ല്യു 7 സീരീസ്, ഓഡി ആർഎസ് 5, ഓഡി ക്യൂ7, റേഞ്ച് റോവർ വോഗ് എന്നിവയുൾപ്പെടെയുള്ള വിലകൂടിയ കാറുകളും അവർ സ്വന്തമാക്കിയിട്ടുണ്ട്.
ഏഷ്യാ കപ്പിനുള്ള ഇന്ത്യൻ ക്രിക്കറ്റ് ടീമിനൊപ്പം കോഹ്ലി നിലവിൽ യുഎഇയിലാണ്. ഹോങ്കോങ്ങിനെതിരായ മത്സരത്തിൽ മികച്ച പ്രകടനം പുറത്തെടുത്ത കോഹ്ലി അപരാജിത അർധസെഞ്ചുറിയുമായി ഫോമിലേക്ക് മടങ്ങിയെത്തിയതിന്റെ ആഹ്ലാദത്തിലാണ് ആരാധകർ.
Comments