പോളണ്ട് : പോളണ്ടിൽ ഇന്ത്യക്കാരന് നേരെ വംശീയാധിക്ഷേപം. ഇന്ത്യക്കാരനെ അധിനിവേശകൻ, അക്രമകാരി എന്നിങ്ങനെ വിളിച്ച് അധിക്ഷേപിക്കുന്ന വീഡിയോയാണ് ഇപ്പോൾ സമൂഹമാദ്ധ്യമങ്ങളിൽ പ്രചരിക്കുന്നത്. അമേരിക്കക്കാരനാണ് ഇന്ത്യൻ വംശജന് നേരെ വർണ്ണത്തിന്റെ പേരിൽ അതിക്രമം നടത്തിയത്. വീഡിയോ പ്രചരിച്ചതോടെ പ്രതിഷേധവുമായി നിരവധി പേർ രംഗത്തെത്തിയിട്ടുണ്ട്.
തന്റെ വീഡിയോ ചിത്രീകരിക്കുന്നത് നിർത്താൻ ഇന്ത്യക്കാരൻ ഇയാളോട് ആവശ്യപ്പെടുന്നുണ്ട്. എന്നാൽ വീഡിയോ റെക്കോർഡ് ചെയ്യാൻ തനിക്ക് അവകാശമുണ്ടെന്ന് അമേരിക്കൻ വംശജൻ പറഞ്ഞു. താൻ അമേരിക്കയിൽ നിന്നാണെന്നും അവിടെയും നിങ്ങളെപ്പോലെ ധാരാളം ആളുകൾ ഉണ്ടെന്നും അയാൾ പറഞ്ഞു. നിങ്ങൾ എന്തിനാണ് പോളണ്ടിലേക്ക് കയറിയത് എന്നും ഇയാൾ ചോദിക്കുന്നത് വീഡിയോയിൽ കേൾക്കാം.
വെള്ളക്കാരുടെ സ്ഥലത്തേക്ക് എന്തിനാണ് നിങ്ങൾ വരുന്നത് എന്നാണ് അമേരിക്കൻ വംശജൻ ചോദിക്കുന്നത്. നിങ്ങൾക്ക് സ്വന്തമായി രാജ്യം കെട്ടിപ്പടുത്താൽ എന്താണ് പ്രശ്‌നം? എല്ലായിടത്തും എന്തിന് വലിഞ്ഞുകയറി ചെല്ലുന്നു ? നിങ്ങൾ അക്രമകാരിയും അധിനിവേശകനുമാണ്. ഇന്ത്യക്കാർ തിരികെ പോകണമെന്നും യൂറോപ്പിന് നിങ്ങളെ ആവശ്യമില്ലെന്നും ഇയാൾ വീഡിയോയിൽ പറയുന്നു.
യൂറോപ്യൻ രാജ്യങ്ങളിൽ ഇന്ത്യക്കാർക്ക് നേരിടേണ്ടിവരുന്ന വംശീയാധിക്ഷേപങ്ങളുടെ വീഡിയോകൾ നേരത്തെയും സമൂഹമാദ്ധ്യമങ്ങളിൽ പ്രചരിച്ചിട്ടുണ്ട്. ഇതിനെതിരെ വ്യാപക വിമർശനങ്ങളാണ് ഉയരുന്നത്.
