ചെന്നൈ: സമൂഹമാദ്ധ്യമങ്ങളിലെ ബോഡി ഷെയ്മിംഗിനെതിരെ പ്രതികരണവുമായി തമിഴ് ചലച്ചിത്ര നിർമ്മാതാവ് രവീന്ദർ ചന്ദ്രശേഖർ. തന്നെ പരിഹസിക്കുന്നവരോട് ഒന്നും പറയാനില്ലെന്ന് അദ്ദേഹം പറഞ്ഞു. സ്വകാര്യമാദ്ധ്യമത്തോട് ആയിരുന്നു അദ്ദേഹത്തിന്റെ പ്രതികരണം.
വ്യാഴാഴ്ചയായിരുന്നു രവീന്ദർ ചന്ദ്രശേഖറും നടിയും അവതാരകയുമായ മഹാലക്ഷ്മിയും വിവാഹിതരായത്. ഇതിന് പിന്നാലെ മഹാലക്ഷ്മി വിവാഹത്തിന്റെ ചിത്രങ്ങൾ ഫേസ്ബുക്കിൽ പങ്കുവെച്ചു. ഇതോടെയായിരുന്നു താരദമ്പതികൾക്കെതിരെ സൈബർ ആക്രമണം ഉണ്ടായത്.
പണം നോക്കിയാണ് മഹാലക്ഷ്മി രവീന്ദറിനെ വിവാഹം ചെയ്തത് എന്നായിരുന്നു സമൂഹമാദ്ധ്യമങ്ങളിൽ ഉയർന്ന പ്രധാന ആക്ഷേപം. ഇതിന് പുറമേ രവീന്ദറിന്റെ ശരീര ഘടനയെ അപമാനിക്കുന്ന തരത്തിലുളള കുറിപ്പുകളും കമന്റുകളായി നിറഞ്ഞു. ഇതോടെയാണ് പ്രതികരണവുമായി അദ്ദേഹം രംഗത്തുവന്നത്.
സമൂഹമാദ്ധ്യമത്തിൽ ഇത്തരത്തിൽ അധിക്ഷേപിക്കുകയും പരിഹസിക്കുകയും ചെയ്യുന്നവരോട് ഒന്നും പറയാനില്ല. മഹാലക്ഷ്മി തന്റെ ഭാഗ്യമാണ്. വിവാഹത്തിന് ആശംസകൾ നേർന്നവർക്ക് നന്ദിയെന്നും രവീന്ദർ പറഞ്ഞു.
