ഷാർജ: ഏഷ്യാ കപ്പ് ക്രിക്കറ്റ് സൂപ്പർ ഫോറിലെ ആദ്യ മത്സരത്തിൽ അഫ്ഗാനിസ്ഥാനെതിരെ ശ്രീലങ്കയ്ക്ക് ജയം. 4 വിക്കറ്റിനാണ് ശ്രീലങ്ക അഫ്ഗാനിസ്ഥാനെ പരാജയപ്പെടുത്തിയത്. ടോസ് നഷ്ടമായി ആദ്യം ബാറ്റിംഗിനിറങ്ങിയ അഫ്ഗാനിസ്ഥാൻ 20 ഓവറിൽ 6 വിക്കറ്റ് നഷ്ടത്തിൽ 175 റൺസ് നേടി. മറുപടി ബാറ്റിംഗിൽ അവസാന ഓവറിലെ ആദ്യ പന്തിൽ 6 വിക്കറ്റ് നഷ്ടത്തിൽ ലങ്ക ലക്ഷ്യം മറികടന്നു.
45 പന്തിൽ 84 റൺസുമായി തകർപ്പൻ ബാറ്റിംഗ് പുറത്തെടുത്ത ഓപ്പണർ റഹ്മാനുള്ള ഗുർബാസാണ് അഫ്ഗാനിസ്ഥാന്റെ ടോപ് സ്കോറർ. 2 വിക്കറ്റ് നേടിയ ദിൽഷൻ മധുശങ്ക, ഓരോ വിക്കറ്റ് വീതം വീഴ്ത്തിയ മഹീഷ് തീക്ഷണ, അസിത ഫെർണാണ്ടോ എന്നിവർ ശ്രീലങ്കയ്ക്ക് വേണ്ടി നന്നായി പന്തെറിഞ്ഞു.
ശ്രീലങ്കയ്ക്ക് വേണ്ടി 19 പന്തിൽ 36 റൺസ് നേടിയ ഓപ്പണർ കുശാൽ മെൻഡിസ്, 35 റൺസ് നേടിയ പാതും നിശാങ്ക, 33 റൺസ് നേടിയ ദനുഷ്ക ഗുണതിലക, 14 പന്തിൽ 31 റൺസ് നേടിയ ഭാനുക രജപക്സ എന്നിവർ മികച്ച ബാറ്റിംഗ് പുറത്തെടുത്തു. അഫ്ഗാനിസ്ഥാന് വേണ്ടി മുജീബുർ റഹ്മാൻ, നവീനുൾ ഹഖ് എന്നിവർ 2 വിക്കറ്റ് വീതവും റാഷിദ് ഖാൻ, മുഹമ്മദ് നബി എന്നിവർ ഓരോ വിക്കറ്റും വീഴ്ത്തി.
സൂപ്പർ ഫോറിലെ സൂപ്പർ പോരാട്ടം നടക്കുന്ന ഞായറാഴ്ച ഇന്ത്യയും പാകിസ്താനും ഏറ്റുമുട്ടും. ഗ്രൂപ്പ് ഘട്ടത്തിലെ ആദ്യ മത്സരത്തിൽ പാകിസ്താനെ 5 വിക്കറ്റിന് തകർത്തതിന്റെ ആത്മവിശ്വാസത്തിലാണ് ഇന്ത്യ ഇറങ്ങുന്നത്. ആദ്യ മത്സരത്തിലെ തോൽവിക്ക് പകരം വീട്ടുക എന്നതാണ് പാകിസ്താന്റെ ലക്ഷ്യം. ദുബായിലാണ് മത്സരം.
