ചെന്നൈ ; മദ്യക്കടയുടെ ചുവര് തുരന്ന് അകത്തുകയറിയ കള്ളന്മാർ മദ്യപിച്ച് ലക്കുകെട്ടു. പിന്നാലെ പോലീസ് എത്തി രണ്ട് പേരെയും പൊക്കിയെടുത്ത് ജീപ്പിലിട്ടു. തമിഴ്നാട്ടിലെ തിരുവള്ളൂർ ജില്ലയിലാണ് സംഭവം. പള്ളിക്കരണി സ്വദേശി സതീഷ്, വിഴുപ്പുറം സ്വദേശി മുനിയൻ എന്നിവരാണ് അറസ്റ്റിലായത്. മോഷണത്തിനായ് അകത്ത് കടന്ന കള്ളന്മാർ അടിച്ച് ഓഫാവുകയായിരുന്നു.
സർക്കാർ മദ്യക്കടയായ ടാസ്മാക്കിൽ മോഷണം നടത്താനാണ് ഇവർ എത്തിയത്. രാത്രി രണ്ട് മണിയോടെ കടയുടെ ചുവര് തുരന്ന് അകത്ത് കയറി മോഷണം നടത്തി. മേശവലിപ്പിലുണ്ടായിരുന്ന 10,000 രൂപയാണ് ഇവർ എടുത്തത്.
പുറത്തിറങ്ങാൻ ഒരുങ്ങുന്നതിനിടെ റാക്കിലിരുന്ന മദ്യക്കുപ്പികളിൽ കണ്ണ് ഉടക്കിയതോടെ രണ്ട് പേരുമെടുത്ത് മൂക്കറ്റം കുടിക്കുകയും ചെയ്തു. ഇതോടെ പുറത്തിറങ്ങാൻ കഴിയാതെ കള്ളന്മാർ ഉള്ളിൽ കുടുങ്ങിപ്പോയി.
കടയുടെ ഉള്ളിൽ മദ്യക്കുപ്പികൾ താഴെ വീഴുന്ന ശബ്ദം കേട്ടാണ് പോലീസുകാർ എത്തിയത്. മുന്നിലെ സിസിടിവി ക്യാമറകളുടെ വയറുകൾ മുറിച്ചുമാറ്റിയത് കണ്ടതോടെ കവർച്ചയാണെന്ന് മനസ്സിലായി. പരിശോധിച്ചപ്പോൾ ഒരു വശത്തെ ചുവര് തുരന്നതായും കണ്ടെത്തി.
കടയിൽ മദ്യലഹരിയിൽ കുടുങ്ങിക്കിടന്ന കള്ളന്മാരെ പോലീസ് വലിച്ചാണ് പുറത്തിറക്കിയത്. നേരെ സ്റ്റേഷനിലെത്തിച്ച രണ്ടുപേരെയും മോഷണക്കുറ്റം ചുമത്തി അറസ്റ്റ് ചെയ്തു.
Comments