ലഖ്‌നൗ: രണ്ടാം യു പി സർക്കാരിന്റെ നേട്ടങ്ങൾ ജനങ്ങളിലേക്കെത്തിക്കാൻ തയ്യാറെടുത്ത് ബിജെപി. ഉത്തർപ്രദേശ് മുഖ്യമന്ത്രി യോഗി ആദിത്യനാഥിന്റെ ഔദ്യോഗിക വസതിയിൽ ചേർന്ന യോഗത്തിലാണ് തീരുമാനം.
സർക്കാർ നടപ്പിലാക്കുന്ന ജനകീയ പദ്ധതികൾ സംസ്ഥാനത്തെ മുഴുവൻ ഗ്രാമങ്ങളിലും എത്തിക്കാനുള്ള ക്യാമ്പയിൻ ഉടൻ ആരംഭിക്കും.
മുഖ്യമന്ത്രി യോഗി ആദിത്യനാഥിന്റെ അദ്ധ്യക്ഷതയിൽ ചേർന്ന യോഗത്തിൽ ഉപമുഖ്യമന്ത്രിമാരായ കേശവ് മൗര്യ , ബ്രിജേഷ് പഥക്, ബിജെപി സംസ്ഥാന അദ്ധ്യക്ഷൻ ഭുപേന്ദ്ര ചൗധരി, ദേശീയ സംഘടനാ സെക്രട്ടറി ധരംപാൽ സിംഗ് കാബിനറ്റ് മന്ത്രി സ്വതന്ത്ര ദേവ് സിംഗ് എന്നിവർ പങ്കെടുത്തു. പാർട്ടിയുടെയും സർക്കാരിന്റെയും മുന്നോട്ടുള്ള പ്രവർത്തനം അവലോകനം ചെയ്ത ബിജെപി കോർ കമ്മിറ്റി യോഗം സംസ്ഥാനത്ത് വൻ വികസന പ്രവർത്തനങ്ങളും തൊഴിൽ അവസരങ്ങളും സൃഷ്ടിക്കുന്നതിന് വേണ്ട നടപടികൾ കൈക്കൊള്ളുമെന്നും തീരുമാനിച്ചു.
സെപ്തംബർ 17ന് പ്രധാനമന്ത്രി നരേന്ദ്രമോദിയുടെ ജന്മദിനത്തോടനുബന്ധിച്ച് രണ്ടാഴ്ചത്തേയ്‌ക്ക് സംസ്ഥാനത്തുടനീളം വിപുലമായ പരിപാടികൾ നടത്താനൊരുങ്ങുകയാണ് ബിജെപി. പ്രധാനമന്ത്രിയെ കുറിച്ചുള്ള എക്സിബിഷനുകൾ ജില്ലാ തലത്തിൽ നടപ്പിലാക്കും. മോദി@20 എന്ന പുസ്തകത്തിന്റെ പ്രചരണത്തിനുള്ള ഒരുക്കങ്ങൾ പൂർത്തിയാക്കും. നവംബറിൽ നടക്കാനിരിക്കുന്ന തദ്ദേശസ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പുകളുൾപ്പെടെ നിരവധി വിഷയങ്ങളിൽ ശക്തമായ പ്രവർത്തനത്തിന് സർക്കാരും പാർട്ടിയും തയ്യാറെടുക്കുമെന്നും അറിയിച്ചു.
