തിരുവനന്തപുരം: മിമിക്രി കലാകാരന്മാർക്ക് ഓണ സമ്മാനവുമായി നടനും ബിജെപി മുൻ എംപിയുമായ സുരേഷ് ഗോപി. പുതിയ ചിത്രത്തിന് ലഭിച്ച അഡ്വാൻസ് തുക മിമിക്രി കലാകാരന്മാരുടെ സംഘടനയായ മാ (എംഎഎ)യ്‌ക്ക് കൈമാറി. രണ്ട് ലക്ഷം രൂപയാണ് സുരേഷ് ഗോപി സംഘടനയ്‌ക്ക് കൈമാറിയത്.
മായുടെ ഓണാഘോഷ പരിപാടിയിൽവെച്ചാണ് സുരേഷ് ഗോപി തുക കൈമാറിയത്. സുരേഷ് ഗോപിയിൽ നിന്നും ഗിന്നസ് പക്രു രണ്ട് ലക്ഷത്തിന്റെ ചെക്ക് കൈപ്പറ്റി. നാദിർഷ, രമേഷ് പിഷാരടി, കലാഭവൻ ഷാജോൺ, ധർമ്മജൻ ബോൾഗാട്ടി സംവിധായകൻ സിദ്ദീഖ് തുടങ്ങിയവർ പരിപാടിയിൽ സന്നിഹിതരായിരുന്നു.
മായ്‌ക്ക് വേണ്ടി പണം സ്വീകരിക്കുന്നതിന്റെ ചിത്രങ്ങൾ ഗിന്നസ് പക്രു ഫേസ്ബുക്കിൽ പങ്കുവെച്ചിട്ടുണ്ട്. ‘വാക്കാണ് ഏറ്റവും വലിയ സത്യം ‘എന്ന് വീണ്ടും തെളിയിച്ചു കൊണ്ടേയിരിക്കുന്നു.. പ്രിയ സുരേഷേട്ടന് ഒരു പാട് നന്ദി .. ഇത്തവണ രണ്ടു ലക്ഷം…..MAA അസോസിയേഷനു വേണ്ടി കൈപ്പറ്റാൻ സാധിച്ചു- എന്ന കുറിപ്പോടെയായിരുന്നു ഗിന്നസ് പക്രു ചിത്രങ്ങൾ പങ്കുവെച്ചത്.
കഴിഞ്ഞ വർഷം ഓണം മുതലാണ് സുരേഷ് ഗോപി മിമിക്രി കലാകാരന്മാരുടെ സംഘടനയ്‌ക്ക് പണം കൈമാറാൻ ആരംഭിച്ചത്. കരാറിൽ ഏർപ്പെടുന്ന പുതിയ ചിത്രങ്ങൾക്ക് ലഭിക്കുന്ന അഡ്വാൻസിൽ നിന്നും രണ്ട് ലക്ഷം രൂപ വീതമാണ് അദ്ദേഹം നൽകിവരുന്നത്. കൊറോണ വ്യാപനത്തെ തുടർന്ന് മിമിക്രി കലാകാരന്മാർ വലിയ സാമ്പത്തിക പ്രതിസന്ധിയാണ് നേരിട്ടിരുന്നത്. ഇതേ തുടർന്നായിരുന്നു പണം നൽകുമെന്ന് അദ്ദേഹം പ്രഖ്യാപിച്ചത്.
