തിരുവനന്തപുരം: ലോക്സഭാ തിരഞ്ഞെടുപ്പിൽ ബിജെപിയെ പരാജയപ്പെടുത്താനുള്ള ദൗത്യത്തിന് കേരളത്തിൽ നേതൃത്വം നൽകുന്നത് തങ്ങളായിരിക്കുമെന്ന് സിപിഎം. ഇടതുപക്ഷ മുന്നണിയ്ക്ക് ലഭിക്കുന്ന ഓരോ വോട്ടും നരേന്ദ്രമോദി ഭരണത്തിനെതിരായ വിധിയെഴുത്താകുമെന്ന് സിപിഎം പറയുന്നു. വരുന്ന ലോകസഭാ തിരഞ്ഞെടുപ്പിൽ എൽഡിഎഫ് വലിയ വിജയം നേടുമെന്നും സിപിഎം അവകാശവാദം ഉന്നയിക്കുന്നു.
നിലവിലെ ദേശീയ രാഷ്ട്രീയ സാഹചര്യത്തിൽ എൽഡിഎഫ് നേടുന്ന സീറ്റുകൾ വലിയ കരുത്താകും. ഭരണഘടനപോലും സംരക്ഷിക്കാനാകാത്ത അവസ്ഥയാണ് രാജ്യത്ത് നിലനിൽക്കുന്നതെന്നാണ് സിപിഎമ്മിന്റ വാദം. ഭരണ സംവിധാനങ്ങളെ വർഗീയത ഗ്രസിച്ചുവെന്നും ഭരണഘടനാ സ്ഥാപനങ്ങളിൽ ആർഎസ്എസ് പിടിമുറുക്കിയെന്നും സിപിഎം സംസ്ഥാന സെക്രട്ടറി എം വി ഗോവിന്ദൻ പറയുന്നു.
ആർഎസ്എസിന്റെ നൂറാംവാർഷികത്തിൽ അവർ ഹിന്ദുരാഷ്ട്രം പ്രഖ്യാപിക്കാനുള്ള നീക്കത്തിലാണ്. ഈ ആവസരത്തിൽ ബിജെപിയെ എതിർക്കുന്നവരെല്ലാം ഒന്നിച്ചുനിൽക്കണം. എൽഡിഎഫ് അടിത്തറ വിപുലീകരിക്കുക എന്നാൽ മറുപക്ഷത്തെ കക്ഷികളെ കൊണ്ടുവരിക എന്നല്ല. ജനപിന്തുണ വർദ്ധിപ്പിക്കുക എന്നതാണ്. യുഡിഎഫിലെ ഘടകകക്ഷികളെ കൂട്ടിക്കൊണ്ടുവരില്ല. മറിച്ച്, ആ പാർട്ടികളിൽ പ്രവർത്തിക്കുന്നവരെക്കൂടി എൽഡിഎഫിന്റെ ഭാഗമാക്കുമെന്നും പ്രസ്താവനയിൽ വ്യക്തമാക്കുന്നു. സംസ്ഥാന സർക്കാർ ജനങ്ങളുടെ ജീവിതം കൂടുതൽ മെച്ചപ്പെടുത്താനുള്ള ശ്രമത്തിലാണെന്നും ഇതിലൂടെ കേരള മോഡൽ അർത്ഥവത്താക്കുമെന്നും സിപിഎം പറഞ്ഞു.
