തിരുവനന്തപുരം : എകെജി സെന്ററിലേക്ക് പടക്കമെറിഞ്ഞ കേസിൽ പ്രതിയെക്കുറിച്ച് സൂചന ലഭിച്ചതായി പ്രചാരണം. സിപിഎമ്മുമായി ബന്ധപ്പെട്ട കേന്ദ്രങ്ങളാണ് പ്രതിയെ കുറിച്ച് പോലീസിന് സൂചന ലഭിച്ചെന്ന് പ്രചാരണം നടത്തുന്നത്. എന്നാൽ ഇക്കാര്യം പോലീസ് സ്ഥിരീകരിച്ചിട്ടില്ല.
2 യൂത്ത് കോൺഗ്രസ് പ്രവർത്തകരെ കേന്ദ്രീകരിച്ചാണ് പോലീസ് അന്വേഷണം നടത്തുന്നതെന്നാണ് സിപിഎം പ്രാദേശിക നേതാക്കൾ ഇന്നലെ പുറത്ത് വിട്ട വിവരം . ഈ നേതാക്കൾ കഴക്കൂട്ടം, മേനംകുളം സ്വദേശികളാണെന്നും പറയുന്നുണ്ട്.
സിപിഎം പ്രദേശിക നേതാക്കൾ നടത്തുന്ന പ്രചാരണം ഇങ്ങനെ, മുഖ്യമന്ത്രിക്കെതിരെ വിമാനത്തിലുണ്ടായ പ്രതിഷേധത്തിന്റെ ആലോചനയിൽ കഴക്കൂട്ടം സ്വദേശിയായ യൂത്ത് കോൺഗ്രസ് പ്രവർത്തകൻ പങ്കെടുത്തിരുന്നു. എന്നാൽ ഇയാൾ കൃത്യം ചെയ്യിച്ചത് മേനംകുളം സ്വദേശിയെ കൊണ്ടാണ്. പ്രതി എന്ന് സൂചന ലഭിച്ച ഒരാളുടെ ബന്ധുവിന് അക്രമി എത്തിയ മോഡലിലുള്ള ചുവന്ന സ്കൂട്ടർ ഉള്ളതായി തിരിച്ചറിഞ്ഞു.
എന്നാൽ ഈ സംശയങ്ങൾ മുൻനിർത്തി പ്രതികൾ ഇവരാണ് എന്ന് ഉറപ്പിക്കാനാകില്ലെന്നാണ് പോലീസ് വ്യക്തമാക്കുന്നത്. ഇതിനു പുറമെ പ്രതിപക്ഷ നേതാവിനുൾപ്പെടെ ആക്രമണ ഗൂഢാലോചനയിൽ പങ്കുണ്ടെന്ന ആക്ഷേപവുമായി ഡിവൈഎഫ്ഐ രംഗത്തെത്തി. ആക്രമണത്തിൽ പങ്കില്ലെന്ന നിലപാട് പ്രതിപക്ഷ നേതാവ് വി.ഡി.സതീശൻ ആവർത്തിച്ചു.
Comments