തിരുവനന്തപുരം: ഇന്ത്യയുടെ ആത്മാവിനെ വീണ്ടെടുക്കാൻ എന്ന പേരിൽ നടത്തുന്ന
ഭാരത് ജോഡോ യാത്രയിലും പതിവ് വിടാതെ രാഹുൽ. ഓരോ കേരള സന്ദർശനത്തിലും തട്ടുകടകളിലും മറ്റും കയറി ഭക്ഷണം ആസ്വദിക്കുന്ന രാഹുലിന്റെ ചിത്രങ്ങളും ദൃശ്യങ്ങളും വൈറൽ ആകാറുണ്ട്. ഇത്തവണയും ഈ പതിവിന് കോൺഗ്രസ് നേതാവ് മാറ്റം വരുത്തുന്നില്ല
യാത്രയ്‌ക്കിടെ ഒരു ചായക്കടയിലെത്തി വിശേഷങ്ങൾ തിരക്കുകയും ചായ കുടിക്കുകയും ചെയ്യുന്ന രാഹുലിന്റെ വീഡിയോ ട്വിറ്ററിലൂടെ കോൺഗ്രസ് പുറത്തുവിട്ടു. ഓരോ ദിവസവും എത്ര വരുമാനമുണ്ടെന്നുൾപ്പെടെ രാഹുൽ ചായക്കട ഉടമയായ ജയകുമാറിനോട് തിരക്കുന്നുണ്ട്. കുടുംബവിശേഷങ്ങളും രാഹുൽ അന്വേഷിച്ചു. ഭാരത് ജോഡോ യാത്രയിൽ രാഹുലിന്റെ ആശയവിനിമയങ്ങൾ പങ്കുവെയ്‌ക്കുന്നതിനൊപ്പമാണ് ഇതിന്റെ വീഡിയോയും പങ്കുവെച്ചത്.
ഇതിന് ശേഷം രതീഷ് എന്ന പ്രവർത്തകന്റെ വീട്ടിൽ നടത്തിയ സന്ദർശനത്തിന്റെ ചിത്രങ്ങളും രാഹുൽ തന്നെ ട്വീറ്റ് ചെയ്തിട്ടുണ്ട്. രതീഷിന്റെ വീട്ടിലെത്തി വൈകുന്നേരത്തെ ചായ കുടിച്ചുവെന്നും ഒരുപാട് കാര്യങ്ങൾ സംസാരിച്ചുവെന്നും രാഹുൽ കുറിച്ചു. എല്ലാ ദിവസത്തേയും പോലെ കുടുംബാംഗങ്ങൾ എല്ലാവരും ഒന്നിച്ചു. നമ്മുടെ ഇന്ത്യ ഒരു കുടുംബമാണെന്നും രാഹുൽ കുറിച്ചു. ചായയ്‌ക്കൊപ്പം ബിസ്‌ക്കറ്റ് കഴിക്കുകയും കുടുംബാംഗങ്ങൾക്ക് അത് പങ്കിട്ട് നൽകുന്നതിന്റെയും ചിത്രങ്ങളും പങ്കുവെച്ചിട്ടുണ്ട്.
യാത്രയുടെ ഭാഗമായി വെങ്ങാനൂർ അയ്യൻകാളി സ്മാരക മന്ദിരത്തിൽ രാഹുൽ പുഷ്പാർച്ചന നടത്തി.
പാറശാലയിൽ നിന്നും നേമത്ത് എത്തിയ യാത്ര ഇന്ന് അവിടെ വിശ്രമിക്കും. ഇതിനിടെ നെയ്യാറ്റിൻകരയിൽ പരമ്പരാഗത നെയ്‌ത്ത് തൊഴിലാളികളുമായി രാഹുൽ സംവദിച്ചു. നെയ്യാറ്റിൻകര ഊരുട്ടുകാല ഡോ.ജി ആർ പബ്ലിക് സ്‌കൂളിലെ കുട്ടികളുമായും ആശയവിനിമയം നടത്തി.
