പാലക്കാട്: ഗവർണർ ആരിഫ് മുഹമ്മദ് ഖാന്റെ അട്ടപ്പാടി സന്ദർശനം ആഘോഷമാക്കി ഗോത്ര ജനത. പരമ്പരാഗതവാദ്യങ്ങളുടെ അകമ്പടിയോടെ നാടൻ പാട്ട് പാടിയാണ് ഗോത്ര ജനത ആരിഫ് മുഹമ്മദ് ഖാനെ എതിരേറ്റത്. ഗവർണർ കൈകൊട്ടി ആ പാട്ടിന് താളമിട്ട് ഒപ്പം കൂടി. മുൻപോട്ട് നീങ്ങവേ ഒപ്പമുണ്ടായിരുന്ന ആളുടെ വാദ്യോപകരണം വാങ്ങി കഴുത്തിലിട്ട് പാട്ടിന് താളം പിടിക്കുകയും ചെയ്തു.
ഗോത്ര വിഭാഗങ്ങളുടെ അവകാശങ്ങളെക്കുറിച്ചുളള യുഎൻ പ്രഖ്യാപനത്തിന്റെ പതിനഞ്ചാം വാർഷികം പ്രമാണിച്ച് നടത്തിയ ആദിവാസി കോൺഫറൻസിൽ മുഖ്യാതിഥിയായി എത്തിയതായിരുന്നു ഗവർണർ ആരിഫ് മുഹമ്മദ് ഖാൻ. താളം പിടിച്ചും കൊട്ടിയും ഗോത്രജനതയ്‌ക്ക് ഒപ്പം ചേർന്ന ഗവർണർ അട്ടപ്പാടിയുടെ മനസ് കവർന്നാണ് മടങ്ങിയത്.
മികച്ച ഗായികയ്‌ക്കുളള ദേശീയ ചലച്ചിത്രപുരസ്‌കാരം നേടിയ നഞ്ചിയമ്മയെയും ഗവർണർ ചടങ്ങിൽ ആദരിച്ചു. നേരത്തെ അട്ടപ്പാടിയിൽ ആൾക്കൂട്ടം ആക്രമിച്ച് കൊലപ്പെടുത്തിയ മധുവിന്റെ കുടുംബത്തെ ഗവർണർ സന്ദർശിച്ചു. മധുവിന്റെ കുടുംബത്തിന് നീതി ലഭ്യമാക്കാൻ ശ്രമിക്കുമെന്ന് ഗവർണർ പറഞ്ഞു.
അട്ടപ്പാടി ചിണ്ടക്കിയിലെ മധുവിന്റെ വീട്ടിലാണ് ഗവർണർ സന്ദർശനം നടത്തിയത്. മധുവിന്റെ അമ്മയെയും സഹോദരിയെയും കണ്ടു. സങ്കടകരമായ സാഹചര്യമാണ് മധുവിന്റെ കുടുംബത്തിന്റെതെന്നും നീതി ലഭ്യമാക്കാൻ ശ്രമിക്കുമെന്നും ഗവർണർ പറഞ്ഞു.
Comments