മലയാളികളുടെ പ്രിയപ്പെട്ട ഭക്ഷണങ്ങളുടെ പട്ടികയിൽ ഒന്നാം സ്ഥാനക്കാരനാണ് പൊറോട്ട. മൈദ കുഴച്ച് പ്രത്യേക രീതിയിൽ ബോൾ വീശി പരത്തി കല്ലിൽ ചുട്ടെടുക്കുന്ന പൊറോട്ടയുടെ മണം മതി നമ്മുടെ വായിൽ കപ്പലോടാനുളള വെളളം നിറയാൻ. ദക്ഷിണേന്ത്യയിൽ ആവിർഭവിച്ച പൊറോട്ടയ്ക്ക് കേരളീയരുടെ മനസ്സ് കീഴടക്കാൻ അധികം സമയം വേണ്ടിവന്നില്ല. പൊറോട്ടയുടെ ഈ പ്രീതി ആലു പൊറോട്ട, ബൺ പൊറോട്ട,കൊത്ത് പൊറോട്ട, ചില്ലി പൊറോട്ട, കോയിൻ പൊറോട്ട തുടങ്ങി പൊറോട്ടാ വൈവിധ്യങ്ങളിലേക്ക് വഴിവെച്ചു. ഇപ്പോഴും ഹോട്ടലുടമകൾ പൊറോട്ടപ്രേമികളുടെ മനം കവരാനുള്ള പരീക്ഷണങ്ങളിലാണ്.
കറിയും ചേർത്ത് കഴിക്കാൻ ഏറെ രസകരമാണ് എങ്കിലും സ്ഥിരമായി കഴിച്ചാൽ ആരോഗ്യത്തെ ബാധിക്കുന്ന ഭക്ഷണം കൂടിയാണ് പൊറോട്ട. ഇത് ഉണ്ടാക്കാൻ ഉപയോഗിക്കുന്ന മൈദയാണ് ആരോഗ്യത്തെ ദോഷകരമായി ബാധിക്കുന്നത്. ഗോതമ്പ് സംസ്കരിക്കുമ്പോൾ ലഭിക്കുന്ന അവശിഷ്ടമാണ് മൈദ. ഈ മൈദയെ മൃദുവാക്കാൻ ഭക്ഷ്യയോഗ്യമാക്കാനായി ബെൻസോയിൽ പെറോക്സൈഡ്, അലോക്സാൻ തുടങ്ങിയ കെമിക്കലുകൾ ഉപയോഗിക്കാറുണ്ട്. ഇവ ശരീരത്തിന് ഏറെ ദോഷകരമാണ്.
നിത്യേന പൊറോട്ട കഴിക്കുന്നവർക്ക് വരാൻ സാദ്ധ്യതയുള്ള പ്രധാന അസുഖമാണ് പ്രമേഹം. മൈദയിൽ അടങ്ങിയിരിക്കുന്ന അലോക്സാൻ ആണ് ഇതിന് കാരണമാകുന്നത്. പാൻക്രിയാസിന്റെ പ്രവർത്തനങ്ങളെ ഇത് പ്രതികൂലമായി ബാധിക്കും. ഇതോടെ ശരീരത്തിൽ പഞ്ചാസാരയുടെ അളവ് കൂടുകയും ക്രമേണ പ്രമേഹത്തിലേക്ക് നയിക്കുകയും ചെയ്യും.
കാർബോ ഹൈഡ്രേറ്റുകൾ വളരെ കൂടിയ അളവിൽ പൊറോട്ടയിൽ അടങ്ങിയിട്ടുണ്ട്. ഇത് ശരീരത്തിലെ ചീത്ത കൊളസ്ട്രോളിന്റെ അളവ് വർദ്ധിപ്പിക്കും. അതിനാൽ പൊറോട്ട സ്ഥിരമായി കഴിക്കുന്നത് കൊളസ്ട്രോളിന് കാരണമാകുന്നു. ഇത് ക്രമേണ ഹൃദയത്തിന്റെ ആരോഗ്യത്തെയും ബാധിക്കും. അതിനാൽ പൊറോട്ട ശീലമാക്കിയവർക്ക് ഹൃദ്രോഗ സാദ്ധ്യതയും വളരെ കൂടുതലാണ്. കലോറി കൂടുതൽ ഉള്ളതിനാൽ പൊറോട്ട അമിത വണ്ണത്തിനും ഇത് മൂലമുള്ള ആരോഗ്യപ്രശ്നങ്ങൾക്കും കാരണമാകും.
പൊറോട്ട കഴിച്ചാൽ പൊതുവേ ദാഹം അനുഭവപ്പെടാറുണ്ട്. ശരീരത്തിലെ ജലാംശം നഷ്ടമാകുന്നതിന് പൊറോട്ട കാരണമാകുമെന്നാണ് ആരോഗ്യവിദഗ്ധർ പറയുന്നത്. പൊറോട്ട മൃദുവാക്കാൻ ഉപയോഗിക്കുന്ന അലോക്സാൻ ആണ് ഇതിന് കാരണമാകുന്നത്. ഈ രാസ വസ്തുക്കൾ കരളിന്റെയും വൃക്കകളുടെയും പ്രവർത്തനങ്ങളെയും ബാധിക്കുന്നു.
കായികാധ്വാനമുള്ള ആളുകൾ പൊതുവേ ഉപയോഗിക്കുന്ന ഭക്ഷ്യവസ്തുവാണ് പൊറോട്ട എന്നത്. പെട്ടെന്ന് വിശക്കില്ല എന്നതാണ് ഇതിന് കാരണം. പതുക്കെ ദഹിക്കുന്ന ഭക്ഷണ സാധനമാണ് പൊറോട്ട. അതുകൊണ്ടുതന്നെ ദഹന പ്രശ്നങ്ങൾക്ക് ഇത് കാരണമാകുന്നു. പൊറോട്ട നിത്യേന കഴിക്കുന്നത് കുടൽ സംബന്ധമായ അസുഖങ്ങളിലേക്ക് നയിക്കുമെന്നാണ് പറയുന്നത്.
