ഇടുക്കി : ഭർതൃവീട്ടിൽ യുവതി ആത്മഹത്യ ചെയ്ത കേസിൽ ഭർത്താവ് അറസ്റ്റിൽ. വളക്കോട് പുത്തൻ വീട്ടിൽ ജോബിഷിനെയാണ് പോലീസ് അറസ്റ്റ് ചെയ്തത്. സ്ത്രീധന പീഡനത്തെ തുടർന്നാണ് ആത്മഹത്യയെന്ന് കണ്ടെത്തിയതിനെ തുടർന്നാണ് അറസ്റ്റ്. മാതാപിതാക്കളെയും കേസിൽ പ്രതിചേർത്തിട്ടുണ്ട്.
ഏലപ്പാറ ഹെലിബറിയ സ്വദേശി എംകെ ഷീജയാണ് ഭർത്താവിന്റെ വീട്ടിൽ ആത്മഹത്യ ചെയ്തത്. സ്ത്രീധന ബാക്കിയെച്ചൊല്ലി ഭർത്താവ് ജോബിഷും മാതാപിതാക്കളും പീഡിപ്പിച്ചതാണ് ആത്മഹത്യയ്ക്ക് കാരണമെന്ന് ഷീജയുടെ കുടുംബം പരാതി നൽകി. ജോബിഷിനെ ചോദ്യം ചെയ്തതിന് പിന്നാലെയാണ് നടപടി.
പത്തു മാസം മുമ്പായിരുന്നു ജോബീഷിന്റെയും ഷീജയുടെ വിവാഹം. ഒന്നര ലക്ഷം രൂപയും എട്ടു പവൻ സ്വർണവുമാണ് സ്ത്രീധനമായി ആവശ്യപ്പെട്ടിരുന്നത്. പണവും ആറു പവൻ സ്വർണവും ജോബീഷിന് കൈമാറി. എന്നാൽ സ്ത്രീധനത്തിന്റെ ബാക്കിയായ രണ്ട് പവൻ ആവശ്യപ്പെട്ട് പ്രതി യുവതിയെ നിരന്തരം മർദ്ദിച്ചിരുന്നു. ഇതേ ആവശ്യം ഉന്നയിച്ച് ജോബീഷിന്റെ അച്ഛൻ ശശിയും അമ്മ കുഞ്ഞമ്മയും ഷീജയെ മാനസികമായും പീഡിപ്പിച്ചിരുന്നു.
ഷീജക്ക് നൽകിയ സ്വർണ്ണത്തിൽ ഒരു ഭാഗം ഇയാൾ സ്വകാര്യ പണമിടപാട് സ്ഥാപനത്തിൽ പണയം വെച്ചിരുന്നു.സംഭവത്തിൽ അന്വേഷണം പുരോഗമിക്കുകയാണ്. മാതാപിതാക്കളെയും ഉടൻ അറസ്റ്റ് ചെയ്യുമെന്നാണ് വിവരം. ജോബിഷിനെ കോടതിയിൽ ഹാജരാക്കി റിമാൻറ് ചെയ്തു.
