അടുത്ത വർഷത്തെ ഓസ്‌കാറിനുള്ള ഇന്ത്യയുടെ ഔദ്യോഗിക എൻട്രിയെ പറ്റിയുള്ള ആരാധകരുടെ പ്രവചനങ്ങളാണ് ഇപ്പോൾ ട്വിറ്ററിൽ നിറയുന്നത്. 95-ാമത് ഓസ്കാർ പുരസ്കാര ചടങ്ങ് 2023 മാർച്ചിൽ നടക്കും. മികച്ച അന്താരാഷ്‌ട്ര ഫീച്ചർ ഫിലിം പുരസ്കാരങ്ങളുടെ വിഭാഗത്തിലേയ്‌ക്ക് അയക്കാൻ കഴിയുന്ന ഇന്ത്യൻ ചിത്രത്തിങ്ങളുടെ പട്ടിക തയ്യാറാക്കാനുള്ള ഒരുക്കത്തിലാണ് ഫിലിം ഫെഡറേഷൻ ഓഫ് ഇന്ത്യയുടെ ജൂറി അംഗങ്ങൾ. പട്ടികയിൽ ഉറപ്പായും സ്ഥാനം പിടിക്കുമെന്ന് ആരാധകരും സിനിമാ പ്രേമികളും വിലയിരുത്തുന്നത് രണ്ട് ചിത്രങ്ങളാണ്. ഒന്ന്, രാജമൗലിയുടെ ബ്രഹ്മാണ്ഡ ചിത്രമായ ആർആർആർ. രണ്ട്, വിവേക് അഗ്നിഹോത്രി സംവിധാനം ചെയ്ത ദ കശ്മീർ ഫയൽസ്. സമീപ കാലത്തെ വലിയ ഹിറ്റുകളായിരുന്നു രണ്ട് ചിത്രവും. ഇതിൽ ഏത് ചിത്രമായിരിക്കും ഓസ്കാർ പുരസ്ക്കാര വേദിയിലേയ്‌ക്ക് പരിഗണിക്കുക എന്നതാണ് സിനിമാ പ്രേമികൾ ചർച്ച ചെയ്യുന്നത്.
‘ആർആർആർ ഫോർ ഓസ്കാർ’ എന്ന ഹാഷ്‌ടാഗോടെ ജൂനിയർ എൻടിആറും രാം ചരണും ഓസ്കാർ പുരസ്കാരം കൈയിൽ പിടിച്ചിരിക്കുന്ന ചിത്രം പങ്കുവെയ്‌ക്കുകയാണ് ഒരു കൂട്ടം സിനിമാ പ്രേമികൾ. അടുത്ത വർഷത്തെ ഓസ്‌കാറിനുള്ള ഇന്ത്യയുടെ ഔദ്യോഗിക എൻട്രിയായി ഈ ചിത്രം തിരഞ്ഞെടുക്കണമെന്ന് ചിലർ ആവശ്യപ്പെടുന്നു. പാൻ-ഇന്ത്യ ഹിറ്റ് മാത്രമല്ല, പാശ്ചാത്യ രാജ്യങ്ങളിൽ പോലും ജനപ്രീതി പിടിച്ചു പറ്റുകയും ഹോളിവുഡ് സിനിമാ നിർമ്മാതാക്കൾ പോലും പ്രശംസിക്കുകയും ചെയ്ത ചിത്രമാണ് ആർആർആർ. അതിനാൽ ഓസ്‌കാറിനുള്ള ഇന്ത്യയുടെ ഔദ്യോഗിക എൻട്രിയായി ചിത്രം പരിഗണിക്കപ്പെടുമെന്നാണ് ആർആർആർ ആരാധകരുടെ അവകാശവാദം.
അതേസമയം, 2023-ലെ ഓസ്കാർ പുരസ്‌കാരത്തിനുള്ള ഇന്ത്യയുടെ ഔദ്യോഗിക എൻട്രിയായി വിവേക് അഗ്നിഹോത്രി സംവിധാനം ചെയ്ത് കശ്മീർ ഫയൽസ് തിരഞ്ഞെടുക്കപ്പെടുമെന്ന് വലിയ ശതമാനം സിനിമാ പ്രേമികൾ അവകാശപ്പെടുന്നു. ‘ഇന്ത്യയുടെ ഓസ്കാർ എൻട്രിയായി കശ്മീർ ഫയൽസ് വരണമെന്ന് ജനങ്ങൾ ആഗ്രഹിക്കുന്നു. ഇതൊരു മികച്ച സിനിമയാണ്. സാങ്കൽപ്പിക കഥകളെ അടിസ്ഥാനമാക്കിയുള്ള സിനിമകൾക്ക് എത്രനാൾ അവാർഡുകൾ നൽകിക്കൊണ്ടിരിക്കും. ‘ദ കശ്മീർ ഫയൽസ്’ പോലൊരു സിനിമ നിർമ്മിക്കാൻ ഒരുപാട് ധൈര്യം ആവശ്യമാണ്’ എന്ന് ചില സിനിമാ പ്രേമികൾ ട്വിറ്ററിൽ കുറിക്കുന്നു. ‘ഒരു സാധാരണ ചിത്രം എത്ര ശക്തമാണെന്നും, ശബ്ദം ഇല്ലാതിരുന്നവരുടെ ശബ്ദം ആയി മാറാൻ ഒരു കൊച്ചു ചിത്രത്തിന് സാധിക്കുമെന്നും മനസ്സിലായത് കാശ്മീർ ഫയൽസ് കണ്ടതോടു കൂടിയാണ്’ എന്ന് ചില സിനിമാസ്വാദകർ ട്വിറ്ററിൽ കുറിച്ചു.
2023-ലെ ഓസ്കാർ പുരസ്‌കാരത്തിനുള്ള ഇന്ത്യയുടെ എൻട്രിയായി ആർആർആർ അല്ലെങ്കിൽ ദി കാശ്മീർ ഫയൽസ് പരിഗഗണിച്ചേക്കുമെന്ന് പ്രമുഖ ട്രേഡ് അനലിസ്റ്റായ രമേഷ് ബാല ട്വീറ്റ് ചെയ്തിരുന്നു. സെപ്റ്റംബർ 16 മുതൽ ഫിലിം ഫെഡറേഷൻ ഓഫ് ഇന്ത്യ ജൂറി അംഗങ്ങൾ ഓസ്‌കാറിന്റെ ഇന്ത്യൻ ഔദ്യോഗിക എൻട്രിക്കായി ഇന്ത്യൻ സിനിമകൾ കണ്ടു വരികയാണ്. ഒക്ടോബർ ആദ്യം വാരം പ്രഖ്യാപനം ഉണ്ടാകുമെന്നാണ് സിനിമാ പ്രേമികൾ പ്രതീക്ഷിക്കുന്നത്.
Comments