ഡൽഹി: സ്റ്റാൻഡ് അപ്പ് കൊമേഡിയൻ രാജു ശ്രീവാസ്തവ അന്തരിച്ചു. 58 വയസ്സായിരുന്നു. ഹൃദയാഘാതത്തെ തുടർന്ന് ചികിത്സയിൽ കഴിയുകയായിരുന്നു അദ്ദേഹം.
രാവിലെയോടെയായിരുന്നു മരണം സംഭവിച്ചത്. രാജു ശ്രീവാസ്തവയുടെ സഹോദരൻ ദിപൂ ശ്രീവാസ്തവയാണ് മരണ വിവരം അറിയിച്ചത്. ഡൽഹി എയിംസിൽ ആയിരുന്നു രാജു ശ്രീവാസ്തവ ചികിത്സയിൽ കഴിഞ്ഞിരുന്നത്. നാൽപ്പത് ദിവസം ആശുപത്രിയിൽ ചികിത്സയിൽ കഴിഞ്ഞ ശേഷമായിരുന്നു അദ്ദേഹത്തിന്റെ വിയോഗം.
ഓഗസ്റ്റ് 10 നായിരുന്നു ഹൃദയാഘാതത്തെ തുടർന്ന് രാജു ശ്രീവാസ്തവയെ ആശുപത്രിയിൽ പ്രവേശിപ്പിച്ചത്. ജിമ്മിൽ വ്യായാമം ചെയ്യുന്നതിനിടെ അദ്ദേഹത്തിന് നെഞ്ചുവേദന അനുഭവപ്പെടുകയായിരുന്നു. ആദ്യ നാളുകളിൽ ആരോഗ്യനില വളരെ മോശമായിരുന്നു എങ്കിലും പിന്നീട് ക്രമേണ മെച്ചപ്പെട്ടു. ഇതോടെ ജീവിതത്തിലേക്ക് തിരിച്ചുവരുമെന്ന പ്രതീക്ഷയിലായിരുന്നു കുടുംബം. എന്നാൽ കഴിഞ്ഞ ദിവസം അദ്ദേഹത്തിന്റെ ആരോഗ്യ നില കൂടുതൽ വഷളാകുകയായിരുന്നു.
Comments