തിരുവനന്തപുരം : തിരുവനന്തപുരത്ത് സംസ്ഥാന സർക്കാരിന്റെ വിനോദ സഞ്ചാര കേന്ദ്രത്തിൽ സദാചാരക്കാരുടെ ആക്രമണം. സന്ദർശകരായി എത്തിയ ആൺകുട്ടികളെയും പെൺകുട്ടികളെയുമാണ് സദാചാര പോലീസ് ചമഞ്ഞ് ആക്രമിച്ചത്. പോത്തൻകോട് വെള്ളാനക്കൽപ്പാറയിലാണ് സംഭവം സംസ്ഥാന സർക്കാരിന്റെ ടൂറിസ്റ്റ് കേന്ദ്രത്തിലാണ് വിദ്യാർത്ഥികൾ എത്തിയത്.
എന്നാൽ ഇവരെ സദാചാര പോലീസ് ചമഞ്ഞ് നാട്ടുകാർ മർദ്ദിക്കുകയായിരുന്നു. പെൺകുട്ടികളെ വടികൊണ്ട് അടിക്കുന്നതും ആൺകുട്ടികളെ കൈയ്യേറ്റം ചെയ്യാൻ ശ്രമിക്കുന്നതും വീഡിയോയിൽ കാണാനാകും. അടിയേറ്റ പെൺകുട്ടികൾ അലറിവിളിക്കുന്നുമുണ്ട്. ഇത് ചോദ്യം ചെയ്യാൻ പോയ സുഹൃത്തുക്കൾക്കെതിരെയും അസഭ്യ വർഷം നടത്തുന്നുണ്ട്.
നിങ്ങൾ പത്രം വായിക്കാറുണ്ടോയെന്ന് ഇയാൾ ചോദിക്കുന്നുണ്ട്. പെൺകുട്ടികളെ വടികൊണ്ട് അടിച്ചത് ചോദ്യം ചെയ്തതിനെയും ഇയാൾ എതിർത്തു.
എന്നാൽ വിദ്യാർത്ഥികൾക്ക് നേരെ നടന്ന ആക്രമണം കണ്ടുനിന്നവരാരും തടയാനോ സംഭവത്തിൽ ഇടപെടാനോ തയ്യാറായില്ല. അഞ്ചോളം വിദ്യാർത്ഥികൾക്കാണ് മർദ്ദനമേറ്റത്. കുട്ടികളുടെ പരാതിയിൽ ശ്രീനാരായണപുരം സ്വദേശി മനീഷിനെതിരെ പോത്തൻകോട് പോലീസ് കേസെടുത്തിട്ടുണ്ട്.
