കൊച്ചി: രാഹുൽ ഗാന്ധി നയിക്കുന്ന ഭാരത് ജോഡോ യാത്രയുടെ പോസ്റ്ററിൽ നിന്നും വി.ഡി.സവർക്കറുടെ ചിത്രം നീക്കം ചെയ്ത് കോൺഗ്രസ് നേതൃത്വം. ആലുവ മണ്ഡലത്തിൽ രാഹുൽ ഗാന്ധിയെ സ്വീകരിക്കാൻ ഒരുക്കിയ സ്വാതന്ത്ര്യസമര സേനാനികളുടെ ചിത്രം ഉൾപ്പെട്ട ബാനറിൽ ഭാരതത്തിന്റെ ധീരപുത്രൻ വി.ഡി.സവർക്കറും ഉണ്ടായിരുന്നു. എന്നാൽ ഇടതുപക്ഷ നേതാക്കളും കോൺഗ്രസിനുള്ളിലെ മതമൗലികവാദികളും സംഭവം വിവാദമാക്കിയതോടെ കോൺഗ്രസ് നേതൃത്വം ചിത്രം നീക്കം ചെയ്യുകയായിരുന്നു.
മുൻ പ്രധാനമന്ത്രി ഇന്ദിരാ ഗാന്ധി അടക്കമുള്ള കോൺഗ്രസ് നേതാക്കൾ വാഴ്ത്തുകയും പുകഴ്ത്തുകയും ചെയ്തിരുന്ന ഭാരതത്തിന്റെ വിപ്ലവ സൂര്യനാണ് വി.ഡി.സവർക്കർ. അങ്ങനെയുള്ള സവർക്കറോട് എന്നു മുതലാണ് കോൺഗ്രസ് നേതാക്കൾക്ക് പുച്ഛം ആരംഭിച്ചതെന്ന് സംഭവം വിവാദമായതോടെ സമൂഹമാദ്ധ്യമങ്ങളിൽ ചോദ്യം ഉയരുന്നു. മതമൗലികവാദികൾക്കും ദേശവിരുദ്ധർക്കും വേണ്ടി സവർക്കറുടെ ചിത്രം ഒഴിവാക്കുന്നതിലൂടെ സ്വാതന്ത്ര്യസമര ചരിത്രത്തെ തന്നെ പരിഹസിക്കുകയാണ് കോൺഗ്രസ്.
മതമൗലികവാദികളുടെ ഭീക്ഷണിയ്ക്ക് വഴങ്ങിയും ന്യൂനപക്ഷ പ്രീണനവും വോട്ട് ബാങ്കും ലക്ഷ്യമിട്ട് ഭാരത്തിന്റെ സ്വാതന്ത്ര്യ സമര ചരിത്രത്തിൽ ഏറെ യാതനകൾ അനുഭവിച്ച സവർക്കറുടെ ചിത്രം സ്വാതന്ത്ര്യസമര സേനാനികളുടെ നിരയിൽ നിന്നും കോൺഗ്രസ് മൂടിവെയ്ക്കുകയാണ് ചെയ്യുന്നത്. ഭാരത് ജോഡോ യാത്രയുടെ പോസ്റ്ററിൽ സവർക്കറെ ഉൾപ്പെടുത്തിയതിന് പി.വി അൻവർ എംഎൽഎ കോൺഗ്രസിനെ പരിഹസിച്ച് രംഗത്തു വന്നിരുന്നു. പിന്നാലെ കോൺഗ്രസ് പ്രവർത്തകരെത്തി സവർക്കറിന്റെ ചിത്രത്തിന് മുകളിൽ ഗാന്ധിജിയുടെ ചിത്രം ഒട്ടിച്ച് മറയ്ക്കുകയായിരുന്നു. ഇതിന്റെ ദൃശ്യം സമൂഹമാദ്ധ്യമങ്ങളിൽ പ്രചരിക്കുന്നുണ്ട്.
