ചെന്നൈ: വൈറൽ ആകാൻ സൂപ്പർ ബൈക്ക് അമിത വേഗത്തിൽ ഓടിച്ച യൂട്യൂബർക്കെതിരെ കേസ്. പ്രമുഖ യൂട്യൂബറും തമിഴ്നാട് സ്വദേശിയുമായ വ്ളോഗർ ടിടിഎഫ് വാസനെതിരെയാണ് കേസ് എടുത്തത്. വൈറൽ ആകുന്നതിന് വേണ്ടി 130 കിലോ മീറ്റർ സ്പീഡിലാണ് ഇയാൾ തിരക്കേറിയ റോഡിലൂടെ വാഹനം ഓടിച്ചത്.
കഴിഞ്ഞ ദിവസം ആയിരുന്നു സംഭവം. വ്ളോഗറായ ജി.പി മുത്തുവെന്ന മറ്റൊരു വ്ളോഗർക്കൊപ്പമായിരുന്നു വാസൻ ബൈക്കിൽ ചീറിപ്പാഞ്ഞത്. സംഭവത്തിൽ മറ്റ് വാഹന യാത്രികർ നൽകിയ പരാതിയിലാണ് വാസനെതിരെ കേസ് എടുത്തിരിക്കുന്നത്.
കോയമ്പത്തൂർ നഗരത്തിലൂടെയായിരുന്നു വ്ളോഗറുടെ അഭ്യാസ പ്രകടനം. മുത്തുവിനെ പുറകിലിരുത്തിയായിരുന്നു വാസൻ അമിത വേഗതയിൽ വാഹനം ഓടിച്ചത്. അമിത വേഗത്തെ തുടർന്ന് മുത്തു ഭയന്ന് നിലവിളിക്കുന്നതായി ദൃശ്യങ്ങളിൽ കാണാം. വാഹനം ഓടിക്കുന്നതിനിടെ വാസൻ ആരെയോ വീഡിയോ കോളും ചെയ്യുന്നുണ്ട്.
അതേസമയം സംഭവത്തിന്റെ ദൃശ്യങ്ങൾ സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്. മറ്റുള്ളവർക്ക് അപകടമുണ്ടാക്കുന്ന രീതിയിൽ വാഹനം ഓടിച്ചതിൽ രൂക്ഷ വിമർശനമാണ് യൂട്യൂബർക്കെതിരെ ഉയരുന്നത്.
Comments