ബേക്കറിയിലെ കണ്ണാടി കൂട്ടിൽ പിരമിഡ് പോലെ അടുക്കി വെച്ചിരിക്കുന്ന ലഡു കണ്ട് കൊതി ഇടാത്തവർ ആരാണുള്ളത്. കുട്ടികൾ മുതൽ മുതിർന്നവർ വരെ തട്ടിപ്പറിച്ചു കഴിക്കുന്ന മഞ്ഞയും, ഓറഞ്ചും, പച്ചയും നിറത്തിലുള്ള സ്വാദേറും ലഡു ഇനി കടയിൽ നിന്നും വാങ്ങി വെറുതെ പൈസ കളയണ്ട. നിങ്ങൾക്ക് സ്വന്തമായി വീട്ടിൽ തന്നെ ഉണ്ടാക്കാം.
സ്വാദിഷ്ടമായ നെയ് ചേർത്തുണ്ടാക്കിയ ലഡു തയ്യാറക്കുന്നതിനായുള്ള ചേരുവകൾ.
കടലമാവ് – 1 കപ്പ്
ബേക്കിംഗ് സോഡ- ഒരു നുള്ള്
ഉപ്പ് – ഒരു നുള്ള്
മഞ്ഞള്പ്പൊടി – ഒരു നുള്ള്
പഞ്ചസാര- ഒന്നരക്കപ്പ്
നെയ്യ്- മൂന്ന് ടീ സ്പൂണ്
കശുവണ്ടി – 10 എണ്ണം
ഉണക്കമുന്തിരി- 10 എണ്ണം
ഏലക്കായ- 3 എണ്ണം
വെളിച്ചെണ്ണ- ആവശ്യത്തിന്
തയ്യാറാക്കേണ്ട വിധം
കടലമാവ് അല്പം വെള്ളവും ഉപ്പും മഞ്ഞള്പ്പൊടിയും ബേക്കിംഗ് സോഡയും ചേർത്ത് ദോശമാവിന്റെ പരുവത്തിൽ മിക്സ് ചെയ്ത് എടുത്ത് മാറ്റി വെക്കുക. ശേഷം ഒരു പാത്രത്തില് എണ്ണ ചൂടാക്കുക. ചൂടായ എണ്ണയുടെ മുകളിൽ ഓട്ടയുള്ള പാത്രമോ, കണ്ണാപ്പയോ പിടിച്ച് അതിലേക്ക് മിക്സ് ഒഴിച്ച് കൊടുക്കുക. ഇത് എണ്ണയില് കിടന്ന് വെന്ത് ഇളം ബ്രൗണ് നിറമാകുമ്പോള് കോരി മാറ്റി വെക്കുക. ഈ തയ്യാറാക്കിയ മിശിതത്തിന് ബുന്ദി എന്നാണ് പറയുന്നത്
കോരി മാറ്റി വെച്ച ബുന്ദി ഒരു മിക്സിയുടെ ജാറില് ഇട്ട് നല്ലതുപോലെ അടിച്ചെടുക്കുക. ഇതിന് ശേഷം പഞ്ചസാര പാനി തയ്യാറാക്കണം. ചൂടുള്ള അടുപ്പിൽ ഒരു കപ്പ് വെള്ളം ഒഴിച്ച് അതിലേക്ക് പഞ്ചസാര ഇട്ട് നല്ലത് പോലെ തിളപ്പിക്കുക. പഞ്ചസാര പാനി നൂൽ പരുവമാകുമ്പോൾ ഇതിലേക്ക് പൊടിച്ച ഏലക്ക ചേർത്ത് കൊടുക്കുക.
പൊടിച്ചു വെച്ച ബുന്ദി എടുത്ത് അതിലേക്ക് എലക്കയും, പഞ്ചസാര പാനിയും, അണ്ടിപ്പരിപ്പും, നെയ്യും ചേർത്ത് നല്ലത് പോലെ ഇളക്കി യോജിപ്പിച്ച ശേഷം മാറ്റി വെക്കുക. ഇളം ചൂടായെന്ന് കണ്ടാൽ കൈ കൊണ്ട് ഉരുളകളാക്കി അതിന്റെ മുകളിൽ അലങ്കാരത്തിന് ഒരു ഉണക്ക മുന്തിരിയോ, ചുവന്ന ചെറിയോ വെക്കാവുന്നതാണ്. പ്രത്യേകം ശ്രദ്ധിക്കേണ്ട കാര്യം ലഡു തയ്യാറാക്കിയാൽ അന്ന് തന്നെ ഒരു കാരണവശാലും കഴിക്കരുത്. ഒരു ദിവസം കഴിയുമ്പോൾ കഴിച്ചാൽ കൂടുതൽ രുചി ലഭിക്കും.
Comments