മലയാളികളുടെ ഇഷ്ട താരമാണ് ഉണ്ണി മുകുന്ദൻ. തന്റെ സിനിമാ ജീവിതത്തിൽ ഇതുവരെ ചെയ്യാത്ത ഒരു വേഷമണിയാൻ ഒരുങ്ങുകയാണ് താരം. മലയാളികളെ വിസ്മയിപ്പിച്ച, കൊതിപ്പിച്ച നിതീഷ് ഭരദ്വാജിന് ശേഷം ഗന്ധർവ്വനായി വേഷമിടുകയാണ് ഉണ്ണി മുകുന്ദൻ. ഗന്ധർവ ജൂനിയർ എന്ന ചിത്രത്തിന്റെ പോസ്റ്റർ താരത്തിന്റെ പിറന്നാൾ ദിനമായ സെപ്റ്റംബർ 22-ന് അണിയറ പ്രവർത്തകർ പുറത്തു വിട്ടിരുന്നു. സെക്കന്റ് ഷോ, കൽക്കി തുടങ്ങിയ ചിത്രങ്ങളിൽ സഹസംവിധായകൻ ആയിരുന്ന വിഷ്ണു അരവിന്ദ് സ്വതന്ത്ര സംവിധായകനാകുന്ന ചിത്രമാണ് ഗന്ധർവ്വ ജൂനിയർ. കൽക്കിക്കു ശേഷം പ്രവീൺ പ്രഭാറാമും സുജിൻ സുജാതനും ചേർന്ന് തിരക്കഥ രചിച്ചിരിക്കുന്ന ചിത്രമാണിത്. ഇപ്പോഴിതാ സിനിമയിൽ ഗന്ധർവ്വനാകുന്നതിന്റെ സന്തോഷം പങ്കുവെച്ചിരിക്കുകയാണ് ഉണ്ണി മുകുന്ദൻ.
പത്മരാജന്റെ ഞാൻ ഗന്ധർവ്വൻ എന്ന സിനിമയിലെ ഗന്ധർവ്വ രൂപത്തിന് സമാനമായി എഡിറ്റ് ചെയ്ത സ്വന്തം ചിത്രം പങ്കുവെച്ചു കൊണ്ടാണ് ഉണ്ണി മുകുന്ദൻ സന്തോഷം അറിയിച്ചിരിക്കുന്നത്. ‘നിങ്ങളിൽ എത്രപേർ സാക്ഷാത്കാരത്തിൽ വിശ്വസിക്കുന്നുവെന്ന് എനിക്കറിയില്ല. എന്നെ സംബന്ധിച്ചിടത്തോളം അസ്തിത്വത്തിന്റെ ഏക തെളിവാണിത്. മനസ്സ് പല കാരണങ്ങളാൽ, നമ്മുടെയെല്ലാം പൂർവ്വികരുടെയും, പ്രപഞ്ചത്തിന്റെയും, അമാനുഷികതയുടെയും എല്ലാം ചരിത്രങ്ങളിൽ ഞാൻ ആകൃഷ്ടനായിരുന്നു. ഗന്ധർവനായി സ്ക്രീനിൽ വരാൻ എനിക്ക് ധാരാളം സന്ദേശങ്ങൾ വരാറുണ്ട്. അങ്ങനെ അഭിപ്രായപ്പെട്ട എല്ലാവരോടും എനിക്ക് പറയാനുള്ളത്, ഞങ്ങളുടെ ചെറിയ ഒരു പ്രകടനത്തിന് ജീവൻ ലഭിച്ചു എന്നാണ്. ഗന്ധർവ്വ എന്ന സിനിമയുടെ പ്രഖ്യാപനത്തോടുള്ള ജനങ്ങളുടെ പ്രതികരണം അവേശം ഉളവാക്കുന്നതാണ്. നിങ്ങളിൽ ഒരാൾ വർഷങ്ങൾക്ക് മുമ്പ് എനിക്ക് എഡിറ്റ് ചെയ്ത് തന്ന ചിത്രം ഞാൻ പങ്കുവെയ്ക്കുന്നു. കാത്തിരിക്കൂ..ഇനി സിനിമയിൽ കാണാം’ എന്നാണ് ഉണ്ണി മുകുന്ദൻ ഫെയ്സ്ബുക്കിൽ കുറിച്ചത്.
ഗന്ധർവ്വ ജൂനിയർ എന്ന പേര് സൂചിപ്പിക്കുന്നതുപോലെ തന്നെ ഫാന്റസിയും ഹാസ്യവുമാണ് ചിത്രത്തിന്റെ ജോണർ. ഒരു ഗന്ധർവ്വന്റെ ഭൂമിയിലേക്കുള്ള അപ്രതീക്ഷിത വരവ് ഉപകാരവും ഉപദ്രവവും ആവുന്ന നർമ്മ നിമിഷങ്ങളിലൂടെയാണ് ചിത്രം മുന്നോട്ട് പോകുന്നത്. ലിറ്റിൽ ബിഗ് ഫിലിംസും ജെ.എം. ഇൻഫോടെയിൻമെന്റും ചേർന്നാണ് ഗന്ധർവ ജൂനിയർ നിർമ്മിക്കുന്നത്.
