ന്യൂഡൽഹി: ‘വസുധൈവ കുടുംബകം’ എന്ന ആശയമാണ് ഭാരതം മുന്നോട്ട് വയ്ക്കുന്നതെന്നും ദേശീയത എന്ന വികാരത്തിലൂന്നിയാണ് രാജ്യം മുന്നോട്ട് പോകുന്നതെന്നും ആർഎസ്എസ് സർസംഘചാലക് ഡോ.മോഹൻ ഭാഗവത്. ഡൽഹിയിൽ സങ്കൽപ്പ് ഫൗണ്ടേഷന്റെ നേതൃത്വത്തിൽ സംഘടിപ്പിച്ച പ്രഭാഷണ പരമ്പരയിൽ സംസാരിക്കുകയായിരുന്നു അദ്ദേഹം.
‘ ഭാരതത്തിന്റെ ദേശീയത മറ്റൊരു രാജ്യത്തിനും ഭീഷണിയല്ല. മറ്റുള്ളവർക്ക് ഭീഷണി ഉയർത്തുക എന്നതല്ല നമ്മുടെ രീതി. ലോകമാകെ ഒരു കുടുംബമാണ്. ലോകത്തെ എല്ലാവരിലും ഈ വികാരം ഉണ്ടാകണമെന്നാണ് നമ്മുടെ ദേശീയതയിലൂടെ പറയുന്നത്. അതുകൊണ്ട് തന്നെ നമ്മുടെ രാജ്യത്ത് നിന്ന് ഒരിക്കലും ഒരു ഹിറ്റ്ലർ ഉണ്ടാകില്ല. അങ്ങനെ സംഭവിച്ചിരുന്നെങ്കിൽ അവനെ നമ്മുടെ രാജ്യത്തെ ജനങ്ങൾ തന്നെ വലിച്ചെറിയുമായിരുന്നു എന്നും’ അദ്ദേഹം പറഞ്ഞു.
‘ ആഗോള വിപണിയെക്കുറിച്ചാണ് എല്ലാവരും സംസാരിക്കാറുള്ളത്. എന്നാൽ ഇന്ത്യ മാത്രമാണ് വസുധൈവ കുടുംബകം എന്ന ആശയത്തെ കുറിച്ച് സംസാരിക്കുന്നത്. സംസാരിക്കുക മാത്രമല്ല ലോകത്തെ ഒരു കുടുംബമാക്കി മാറ്റുന്നതിനും ഭാരതം പ്രവർത്തിച്ചു കൊണ്ടിരിക്കുകയാണ്. ഇന്ത്യയുടെ ദേശീയതയെക്കുറിച്ചുള്ള ആശയം മറ്റുള്ളവരിൽ നിന്ന് വ്യത്യസ്തമാണെന്നും’ അദ്ദേഹം പറഞ്ഞു.
Comments