നവരാത്രിവ്രതം അനുഷ്ഠിക്കുന്നവർ എന്തുകൊണ്ടാണ് ചില ആഹാരങ്ങൾ ഒഴിവാക്കണമെന്ന് പറയുന്നത് ? ഇതാണ് അതിന് കാരണം

സംഗീതത്തിന്റെയും നൃത്തത്തിന്റേയും വിദ്യാരംഭത്തിന്റെയും ഉത്സവമാണ് നവരാത്രി. ഒൻപത് രാത്രിയും പത്ത് പകലും നീണ്ടു നിൽക്കുന്ന ഈ ഉത്സവത്തിൽ ആദിപരാശക്തിയുടെ ഒൻപത് രൂപങ്ങളെ ആരാധിക്കുന്നു. ഈ സമയത്തെ നവരാത്രി വ്രതം പ്രശസ്തമാണ്.

എന്നാൽ ചില ഭക്ഷണപദാർത്ഥങ്ങൾ വ്രതം അനുഷ്ഠിക്കുന്നവർ ഒഴിവാക്കേണ്ടതാണ്. വ്രത കാലാഘട്ടത്തിലെ ക്ഷീണം മാറുന്നതിനും ആരോഗ്യപൂർണ്ണമാകുന്നതിനുമാണ് ചില ആഹാരങ്ങൾ ഒഴിവാക്കണമെന്ന് പറയുന്നതിന്റെ പൊരുൾ. ഭൂരിഭാഗം ആളുകളും മത്സ്യമാംസാദികൾ വർജിച്ചും മദ്യം ഒഴിവാക്കിയും ലഘുവായ ഭക്ഷണം കഴിച്ചുമാണ് വ്രതം അനുഷ്ഠിക്കുന്നത്. എന്നാൽ നവരാത്രി വ്രതത്തിന് പ്രത്യേക നിബന്ധനകളുണ്ട്. അവ എന്തൊക്കെ ആണെന്ന് നോക്കാം.

ഒഴിവാക്കേണ്ടവ

വെളുത്തുള്ളി, ഉള്ളി, ഗോതമ്പ്, അരി, പയർ, മാംസം, മുട്ട, സുഗന്ധവ്യഞ്ജനങ്ങൾ (മഞ്ഞൾ, മല്ലിപ്പൊടി, കടുക്, വിദേശ മസാലപ്പൊടി, ഗ്രാമ്പൂ), മദ്യം, പുകയില, ഉണങ്ങിയ പഴങ്ങൾ, പരിപ്പ് എന്നിവ നിർബന്ധമായും ഒഴിവാക്കേണ്ട ഭക്ഷണ പദാർത്ഥങ്ങളാണ്. ഗോതമ്പ്, മൈദ, അരിപ്പൊടി, കോൺ ഫ്‌ളോർ, സൂചി ഗോതമ്പ് എന്നിവയും വർജ്ജിക്കേണ്ടതാണ്. ഉള്ളിയും ,വെളുത്തുള്ളിയും ഉപയോഗിച്ചാൽ ശരീരത്തിലെ താപനില വർദ്ധിപ്പിക്കും. അതുവഴി ക്ഷീണം അനുഭവപ്പെടും. സുഗന്ധവ്യഞ്ജനങ്ങൾ ഒഴിവാക്കണമെന്ന് പറയുന്നതിന് പിന്നിലും ഇതാണ് കാരണം. ആയുർവേദ വിധി പ്രകാരം ദഹിക്കാൻ സമയമെടുക്കുന്നവയാണ് മേൽപ്പറഞ്ഞവ.

കഴിക്കേണ്ടവ

വ്രത സമയത്ത് ഒഴിച്ച് കൂടാനാകാത്ത ഒന്നാണ് പഴങ്ങൾ.പാലിൽ ചേർത്ത് ഷെയ്‌ക്കോ ജ്യൂസോ, ഫ്രൂട്ട് മിക്‌സ് ആക്കിയോ കഴിക്കാം. ഉപ്പിന് പകരം റോക്ക് സോൾട്ട് ഉപയോഗിക്കാം. എല്ലാത്തരം പച്ചക്കറികളും ഈ കാലയളവിൽ ഭക്ഷണത്തിൽ ഉൾപ്പെടുത്തണം. എന്നാൽ ശരീരത്തിലെ താപനില ഉയർത്താത്ത പച്ചക്കറികൾ വേണം തിരഞ്ഞെടുക്കാൻ. പാൽ, തൈര്, ഉരുളക്കിഴങ്ങ്, വാഴപ്പഴം,പാവയ്‌ക്ക, തക്കാളി, ക്യാരറ്റ്, ചെറുനാരങ്ങ, ചീര,മത്തങ്ങ എന്നിവയൊക്കെ നവരാത്രി വ്രത കാലത്ത് കഴിക്കാവുന്നതാണ്.

തളർച്ചയില്ലാതെ എങ്ങനെ വ്രതമെടുക്കാം

ശരീരത്തിൽ ജലാംശം നിലനിർത്തേണ്ടത് പ്രധാനമാണ്. ഇല്ലെങ്കിൽ നിർജ്ജലീകരണത്തിന് കാരണമാകും. വ്രതം നോക്കുന്നവർ ദിവസവും 10 മുതൽ 15 വരെ ഗ്ലാസ് വെള്ളം കുടിക്കണമെന്നാണ് ആരോഗ്യവിദഗ്ധർ പറയുന്നത്. കൊഴുപ്പ് കുറഞ്ഞ പാൽ, പച്ചക്കറി, പഴച്ചാറുകൾ എന്നിവ ജലാംശം നിലനിർത്തുകയും ശരീരത്തിലെ മറ്റ് ഘടകങ്ങളും ആവശ്യത്തിന് നിലനിർത്തുകയും ചെയ്യുന്ന മാർഗങ്ങളാണ്.

വ്രതകാലത്ത് ഉപവാസ രീതി പിന്തുടരുന്നതിനാൽ ലഘു ഭക്ഷണം കഴിക്കാൻ ശ്രമിക്കണം. നീണ്ട ഉപവാസം ബലഹീനത, വിളർച്ച, ക്ഷീണം, തലവേദന എന്നിവയിലേക്ക് നയിച്ചേക്കാം. ഇടയ്‌ക്കിടെയുള്ള ചെറിയ പോഷകാഹാരങ്ങളിലൂടെ ഈ പ്രശ്‌നം പരിഹരിക്കാവുന്നതാണ്. ശരീരത്തിലെ ഊർജ്ജം നിലനിർത്തുന്നതിനായി ദിവസവും 5-6 തവണ ആയി ഭക്ഷണം കഴിക്കാവുന്നതാണ്. എന്നാൽ അമിതമായി ഭക്ഷണം കഴിക്കാൻ പാടില്ല എന്നത് പ്രത്യേകം ശ്രദ്ധിക്കണം. ദിവസവും 7-8 മണിക്കൂർ നേരം ഉറങ്ങുന്നത് തലകറക്കം, തലവേദന തുടങ്ങിയ പ്രശ്‌നങ്ങൾക്കുള്ള പരിഹാരമാകും.