കേരളത്തിൽ മാത്രമല്ല, കേരളത്തിന് പുറത്തും ആരാധകരുള്ള താരമാണ് ദുൽഖർ സൽമാൻ. ചെറിയ കാലത്തിനുള്ളിൽ തന്നെ ഇന്ത്യയൊട്ടാകെ അറിയപ്പെടുന്ന സൂപ്പർ താരമായി ദുൽഖർ സൽമാൻ ഉയർന്നു. മലയാളത്തിന് പുറമെ തമിഴ്, തെലുങ്ക്, ഹിന്ദി സിനിമകളിൽ തിരക്കുള്ള താരമാണ് അദ്ദേഹം. മലയാളത്തിൽ ‘കുറുപ്പ്’, തമിഴിൽ ‘കണ്ണും കണ്ണു കൊള്ളയടിത്താൽ’, തെലുങ്കിൽ ‘സീതാരാമം’, ഹിന്ദിയിൽ ‘ചുപ്’ എന്നിങ്ങനെ വിവിധ ഭാഷകളിലായി അടുത്തിടെ നാല് ഹിറ്റുകളാണ് ദുൽഖർ സൽമാൻ സ്വന്തമാക്കിയത്. ഇന്ത്യയ്‌ക്ക് പുറത്തും താരത്തിന് ആരാധകരേറെയാണ്. ഇപ്പോൾ ശ്രദ്ധ നേടുന്നതും ചില ആരാധകരുടെ പ്രതികരണങ്ങളാണ്. ശ്രീലങ്കയിൽ നിന്നുള്ള ആരാധകരെ കണ്ട് ദുൽഖർ തന്നെ അമ്പരന്നിരിക്കുകയാണ്. ഹിറ്റ് എഫ്എം 96.7 ന് നൽകിയ അഭിമുഖത്തിനിടെ ആർജെ രണ്ട് കടുത്ത ദുൽഖർ ആരാധകരുടെ വീഡിയോ താരത്തെ കാണിച്ചത്.
‘ഞാൻ നിങ്ങളുടെ വലിയ ആരാധികയാണ്. താങ്കളുടെ എല്ലാ സിനിമകളും കണ്ടിട്ടുണ്ട്. എനിക്ക് മലയാളം അത്ര നന്നായി മനസ്സിലാകുന്നില്ല. എന്നാൽ മലയാള സിനിമകൾ കാണുന്നത് നിങ്ങളെ കാണാനാണ്. ചാർലി, ഹായ് സിനാമിക, സീതാരാമം എന്നിവയാണ് എന്റെ പ്രിയപ്പെട്ട സിനിമകൾ. അതിൽ ദുൽഖറിന്റെ പ്രകടനം ഗംഭീരമാണ്. വരാനിരിക്കുന്ന എല്ലാ സിനിമകൾക്കും എല്ലാ ആശംസകളും നേരുന്നു. ഇനിയും ഒരുപാട് സിനിമകൾ ചെയ്യാൻ കഴിയട്ടെ’ എന്ന് ശ്രീലങ്കയിൽ നിന്ന് ഒരു ആരാധിക പറയുന്നു.
ദുൽഖറിനെ കാണിച്ച മറ്റൊരു വീഡിയോ ഒരു ദമ്പതികളുടെ ആയിരുന്നു. പുലർച്ചെ അഞ്ച് മണിക്ക് ജോലിക്ക് പോകുന്ന ശ്യാമള എന്ന ശ്രീലങ്കൻ യുവതി നാല് മണിക്ക് എഴുന്നേറ്റ് ഭർത്താവിനെയും കുഞ്ഞിനെയും കൂട്ടി ദുൽഖറിന് വേണ്ടി വീഡിയോ ഷൂട്ട് ചെയ്യുകയായിരുന്നു. ‘ഹായ് ദുൽഖർ സൽമാൻ, എന്റെ പേര് അമർ, ഇതാണ് ശ്യാമള. ഞങ്ങൾ ശ്രീലങ്കയിലാണ് താമസിക്കുന്നത്. ഉസ്താദ് ഹോട്ടൽ മുതൽ ഞങ്ങൾ നിങ്ങളുടെ വലിയ ആരാധകരാണ്. തമിഴിലും തെലുങ്കിലും താങ്കളുടെ ഒരു സിനിമ പോലും ഞങ്ങൾ നഷ്ടപ്പെടുത്താറില്ല. എന്നാൽ ഈ വീഡിയോയിലെ സസ്പെൻസ് എന്തെന്നാൽ, ദുൽഖർ സൽമാൻ എന്നാണ് എന്റെ കുഞ്ഞിന്റെ പേര്. നിങ്ങളെ സ്നേഹിക്കുന്ന ഒരുപാട് പേർ ഇവിടെയുണ്ട്. സീതാരാമം കണ്ടു.
താങ്കളുടെ അടുത്ത സിനിമയ്‌ക്കായി കാത്തിരിക്കുകയാണ്, ഒരു ദിവസം കാണാമെന്ന പ്രതീക്ഷയോടെ. ഇതാ നമ്മുടെ ശ്രീലങ്കൻ ദുൽഖർ സൽമാൻ. അദ്ദേഹവും ഒരുനാൾ ഇൻഡസ്ട്രിയിലേക്ക് എത്തുമെന്ന് പ്രതീക്ഷിക്കുന്നു’ എന്ന് കുഞ്ഞിനെ കാണിച്ചു കൊണ്ട് അമർ അമർ പറഞ്ഞു. വളരെ സന്തോഷത്തോടെയാണ് ദുൽഖർ തന്റെ ശ്രീലങ്കൻ ആരാധകരുടെ വീഡിയോ കണ്ടത്.
