കൽപ്പറ്റ: കേന്ദ്ര സർക്കാർ ഫണ്ട് ഉപയോഗിച്ച് പ്രവർത്തിക്കുന്ന ദേശീയ ആരോഗ്യ ദൗത്യത്തിന്റെ ജീവനക്കാരുടെ ഡ്യൂട്ടി, സി ഐ ടി യു അനുകൂല സംഘടനയുടെ ജില്ലാ സമ്മേളനത്തിന് അനുസൃതമായി ക്രമീകരിക്കണമെന്ന് ആവശ്യപ്പെട്ട് സർക്കുലർ പുറത്തിറക്കി ജില്ലാ പ്രോഗ്രാം മാനേജർ. സർക്കുലറിന്റെ പകർപ്പ് ജനം ടിവിക്ക് ലഭിച്ചു.
എൻ എച്ച് എം എംപ്ലോയീസ് യൂണിയൻ വയനാട് ജില്ലാ സമ്മേളനം 28/09/2022 ബുധനാഴ്ച നടക്കുകയാണ്. ജീവനക്കാർക്ക് ഇതിൽ പങ്കെടുക്കുന്നതിനായി ഡ്യൂട്ടി ക്രമീകരണം അനുവദിക്കണമെന്ന് കാട്ടി ദേശീയ ആരോഗ്യ ദൗത്യത്തിന് കീഴിൽ പ്രവർത്തിക്കുന്ന സ്ഥാപനങ്ങളുടെ മേധാവിമാർക്ക് ജില്ലാ പ്രോഗ്രാം മാനേജർ ഡോക്ടർ സമീഹ സൈദലവി അയച്ച സർക്കുലറാണ് പുറത്ത് വന്നിരിക്കുന്നത്.
കേന്ദ്ര സർക്കാരിന്റെ കൊറോണ പ്രതിരോധ പ്രവർത്തനങ്ങൾ, കൊറോണ- റാബീസ് എന്നിവ ഉൾപ്പെടെയുള്ള പകർച്ചവ്യാധികൾക്കുള്ള വാക്സിൻ വിതരണം, ആദിവാസി മേഖലകളിലെ പ്രത്യേക ആരോഗ്യ പ്രവർത്തനങ്ങൾ, മാതൃ-ശിശു പരിചരണം എന്നിവയിൽ നിർണ്ണായക പങ്ക് വഹിക്കുന്നത് എൻ എച്ച് എം ആണ്. കൊറോണ പ്രതിരോധ പ്രവർത്തനങ്ങളേയും പേവിഷ പ്രതിരോധ പ്രവർത്തനങ്ങളേയും ദോഷകരമായി ബാധിക്കുന്ന തരത്തിൽ പാർട്ടി പരിപാടിക്കായി ഡ്യൂട്ടി ക്രമീകരണം നടത്താൻ ഔദ്യോഗികമായി ആവശ്യപ്പെടുന്ന സർക്കുലർ നിരുത്തരവാദപരവും ജനങ്ങളുടെ ആരോഗ്യവും ജീവനും വെച്ച് പന്താടാൻ ഉദ്ദേശിച്ചിട്ടുള്ളതുമാണെന്നാണ് പ്രധാനമായും ഉയരുന്ന ആക്ഷേപം.
