എറണാകുളം: സൈബർ ആക്രമണങ്ങളിൽ പരാതി നൽകാനൊരുങ്ങി ഗായിക അഭിരാമി സുരേഷ്. സമൂഹമാദ്ധ്യമത്തിലൂടെയാണ് ഗായിക ഇക്കാര്യം അറിയിച്ചത്. തനിക്കും കുടുംബത്തിനുമെതിരെ രൂക്ഷമായ സൈബർ ആക്രമണമാണ് നടക്കുന്നതെന്നും, സൈബർ സെല്ലിൽ ഉടൻ പരാതി നൽകുമെന്നും അഭിരാമി വ്യക്തമാക്കി.
താടിയെല്ല് അൽപ്പം മുന്നോട്ടിരിക്കുന്ന പ്രോഗ്നാത്തിസം എന്ന ശാരീരിക അവസ്ഥ തനിക്ക് ഉണ്ട്. എന്നാൽ ഇത് കണ്ട് മുഖം കുരങ്ങിന്റേത് പോലെയാണെന്ന് പറഞ്ഞ് അധിക്ഷേപിക്കുന്നു. കുടുംബത്തെയും ചിലർ ആക്ഷേപിക്കുന്നു. സമൂഹമാദ്ധ്യമത്തിൽ എന്ത് പോസ്റ്റ് ചെയ്താലും അധിക്ഷേപ കമന്റുകൾ നിറയുകയാണ്. കേട്ടാൽ അറയ്ക്കുന്ന തെറിയും പോസ്റ്റുകൾക്ക് താഴെ ഇത്തരക്കാർ കമന്റായി ഇടാറുണ്ട്. ഇവർക്കെതിരെ നിയമപരമായി മുന്നോട്ട് പോകാനാണ് തീരുമാനം. ജീവിക്കാൻ പറ്റാത്ത അവസ്ഥയാണ് നിലവിലുള്ളതെന്നും ഗായിക പ്രതികരിച്ചു.
എന്ത് ചെയ്താലും ബാലയുടെ പണം കൊണ്ടാണെന്നാണ് പൊതുവെ ഉയരുന്ന പ്രതികരണം. എന്നാൽ താൻ ചിലവഴിക്കുന്നത് സ്വന്തം പണമാണ്. താൻ ജോലി ചെയ്തുണ്ടാക്കിയ പണമാണ്. തങ്ങൾക്ക് ആരുടെയും സഹതാപം വേണ്ടെന്നും അഭിരാമി പ്രതികരിച്ചു.
Comments