2023-ലെ ഓസ്കറിനുളള മികച്ച അന്താരാഷ്ട്ര ഫീച്ചർ ഫിലിം വിഭാഗത്തിൽ ഇന്ത്യയുടെ ഔദ്യോഗിക എൻട്രി നേടിയ ചിത്രമാണ് ‘ചെല്ലോ ഷോ’. ഈ മാസം ആദ്യമാണ് ഫിലിം ഫെഡറേഷൻ ഓഫ് ഇന്ത്യ രൂപീകരിച്ച സെലക്ഷൻ കമ്മിറ്റി പാൻ നളിൻ സംവിധാനം ചെയ്ത ഗുജറാത്തി ചിത്രമായ ‘ചെല്ലോ ഷോ’ ഏകകണ്ഠമായി തിരഞ്ഞെടുത്തത്. ട്രൈബെക്ക ഫിലിം ഫെസ്റ്റിവലിലടക്കം പ്രദർശിപ്പിച്ച ചിത്രം ഒക്ടോബർ 14-ന് തിയറ്ററുകളിൽ റിലീസ് ചെയ്യാൻ ഒരുങ്ങുകയാണ്. ഇതിന്റെ ഭാഗമായി സിനിമയുടെ ട്രെയിലർ പുറത്തു വിട്ടിരിക്കുകയാണ് അണിയറ പ്രവർത്തകർ.
സൗരാഷ്ട്രയിലെ ഒരു വിദൂര ഗ്രാമീണമേഖലയിലാണ് കഥ നടക്കുന്നത്. ഒമ്പത് വയസ്സ് പ്രായമുള്ള സമയ് എന്ന ബാലൻ സിനിമാ പ്രൊജക്ടർ ടെക്നീഷ്യനായ ഫസലിനെ സ്വാധീനിച്ച് സിനിമകൾ കാണുന്നതും സിനിമ സ്വപ്നം കാണുന്നതുമാണ് ‘ചെല്ലോ ഷോ’യിൽ ദൃശ്യവത്കരിച്ചിരിക്കുന്നത്. ചെല്ലോ ഷോ എന്ന വാക്കിന്റെ അർത്ഥം അവസാന സിനിമാ പ്രദർശനം എന്നാണ്. സംവിധായകന്റെ തന്നെ കുട്ടിക്കാലത്തെ ഓർമ്മകളെ അടിസ്ഥാനമാക്കിയാണ് ചിത്രം ഒരുക്കിയിരിക്കുന്നത്. താൻ എങ്ങനെ സിനിമയിൽ ആകൃഷ്ടനായി എന്നാണ് ‘ചെല്ലോ ഷോ’ എന്ന തന്റെ ചിത്രത്തിലൂടെ നളിൻ പറയുന്നത്.
സിദ്ധാർത്ഥ് റോയ് കപൂറിന്റെ ബാനറിൽ റോയ് കപൂർ ഫിലിംസ് ആണ് ചിത്രം അവതരിപ്പിക്കുന്നത്. ജുഗാദ് മോഷൻ പിക്ചേഴ്സ്, മൺസൂൺ ഫിലിംസ്, ചെല്ലോ ഷോ എൽഎൽപി, മാർക്ക് ഡ്യുവൽ എന്നിവർ ചേർന്നാണ് ചെല്ലോ ഷോ നിർമ്മിച്ചിരിക്കുന്നത്. ഭവിൻ റബാരി, ഭവേഷ് ശ്രീമാലി, റിച്ച മീന, ദിപെൻ റാവൽ, പരേഷ് മേത്ത തുടങ്ങിയവരാണ് അഭിനേതാക്കൾ. സ്പെയിനിൽ നടന്ന 66-ാമത് വല്ലാഡോലിഡ് ഫിലിം ഫെസ്റ്റിവലിൽ ഗോൾഡൻ സ്പൈക്ക് ഉൾപ്പെടെ നിരവധി അവാർഡുകൾ ചെല്ലോ ഷോ സ്വന്തമാക്കിയിട്ടുണ്ട്.
