കാസർകോഡ് : പ്ലസ് വൺ വിദ്യാർത്ഥിയെ സീനിയർ വിദ്യാർത്ഥികൾ റാഗ് ചെയ്തെന്ന് പരാതി. അംഗടിമുഗൾ ഗവ. ഹയർ സെക്കണ്ടറി സ്കൂളിലെ പ്ലസ് വൺ വിദ്യാർത്ഥിയാണ് റാഗിങ്ങിന് ഇരയായത്. വീട്ടിൽ പോകാനിറങ്ങിയ കുട്ടിയെ ബസ് കാത്തിരിപ്പ് കേന്ദ്രത്തിനകത്ത് വച്ച് സീനിയർ വിദ്യാർഥികൾ റാഗ് ചെയ്യുകയായിരുന്നു. ഇതിന്റെ ദൃശ്യങ്ങൾ സമൂഹമാദ്ധ്യമങ്ങളിൽ പ്രചരിക്കുന്നുണ്ട്.
ആൾക്കൂട്ടത്തിനിടയിൽ തടഞ്ഞ് വച്ചാണ് വിദ്യാർത്ഥിയെ റാഗ് ചെയ്തിരിക്കുന്നത്. പിന്നാലെ വിഷയത്തിൽ നാട്ടുകാർ ഇടപെടുകയായിരുന്നു. സംഭവത്തിൽ കുട്ടിയുടെ അച്ഛനാണ് സീനിയർ വിദ്യാർത്ഥികൾക്കെതിരെ പോലീസിൽ പരാതി നൽകിയത്. പരാതിയുടെ അടിസ്ഥാനത്തിൽ പോലീസ് അന്വേഷണം ആരംഭിച്ചു.
കഴിഞ്ഞ ദിവസം വൈകിട്ടാണ് സംഭവം നടക്കുന്നത്. കുട്ടിയോട് സാങ്കൽപ്പികമായി മോട്ടോർ സൈക്കിൾ ഓടിക്കാൻ സീനിയർ വിദ്യാർഥികൾ നിർബന്ധിക്കുന്നത് ദൃശ്യങ്ങളിൽ വ്യക്തമാണ്. ഭയന്ന വിദ്യാർത്ഥി ഭീഷണിപ്പെടുത്തിയതിനെ തുടർന്ന് മോട്ടോർ സൈക്കിൾ ഓടിക്കുന്നതായി അഭിനയിച്ചു കാണിക്കുന്നുമുണ്ട്. ഇതിന്റെ ദൃശ്യങ്ങൾ പുറത്ത് വന്നതോടെ കുട്ടിയുടെ അച്ഛൻ പോലീസിനെ സമീപിക്കുകയായിരുന്നു. കുമ്പള പോലീസാണ് കേസ് അന്വേഷിക്കുന്നത്.
Comments