അഹമ്മദാബാദ്: മുപ്പത്തിയാറാമത് ദേശീയ ഗെയിംസ് ഉദ്ഘാടനം ചെയ്ത് പ്രധാനമന്ത്രി നരേന്ദ്ര മോദി. അഹമ്മദാബാദിലെ നരേന്ദ്ര മോദി സ്റ്റേഡിയത്തിലായിരുന്നു ഉദ്ഘാടന ചടങ്ങുകൾ. ചടങ്ങിൽ സ്വർണിം ഗുജറാത്ത് കായിക സർവകലാശാലയും പ്രധാനമന്തി രാജ്യത്തിന് സമർപ്പിച്ചു.
ഉദ്ഘാടന ചടങ്ങിലെ ത്രസിപ്പിക്കുന്ന അന്തരീക്ഷം ആവേശകരമാണെന്ന് പ്രധാനമന്ത്രി പറഞ്ഞു. ഗെയിംസിൽ പങ്കെടുക്കാൻ എത്തിയിരിക്കുന്ന കായിക താരങ്ങളുടെ മുഖങ്ങളിലെ ആത്മവിശ്വാസം ഇന്ത്യൻ കായിക രംഗത്തിന്റെ വരാനിരിക്കുന്ന ശോഭനമായ നാളുകളിലേക്കുള്ള ദിശാസൂചിയാണ്. ഇത്രയും ഗംഭീരമായ ഒരു ചടങ്ങ് ഏവർക്കും അഭിമാനകരമാണെന്നും പ്രധാനമന്ത്രി വ്യക്തമാക്കി.
സ്റ്റേഡിയത്തിലെ സൗകര്യങ്ങളിൽ പ്രധാനമന്ത്രി സംതൃപ്തി രേഖപ്പെടുത്തി. ഇത് രാജ്യത്തിനാകെ മാതൃകയാണ്. അടിസ്ഥാന സൗകര്യങ്ങൾ മെച്ചപ്പെടുമ്പോൾ കായിക താരങ്ങളുടെ ആത്മവിശ്വാസവും വർദ്ധിക്കുമെന്നും പ്രധാനമന്ത്രി പറഞ്ഞു.
കഴിഞ്ഞ വർഷങ്ങളിൽ കായിക രംഗത്ത് രാജ്യം നേടിയ പുരോഗതികളും പ്രധാനമന്ത്രി ചടങ്ങിൽ ഓർമ്മിപ്പിച്ചു. എട്ട് വർഷങ്ങൾക്ക് മുൻപ് നൂറിൽ താഴെ അന്താരാഷ്ട്ര ഇനങ്ങളിൽ മാത്രമാണ് ഇന്ത്യ പങ്കെടുത്തിരുന്നത്. എന്നാൽ, ഇന്ന് മുന്നൂറ് അന്താരാഷ്ട്ര കായിക ഇനങ്ങളിൽ ഇന്ത്യൻ താരങ്ങൾ പങ്കെടുക്കുന്നുണ്ടെന്നും പ്രധാനമന്ത്രി വ്യക്തമാക്കി.
Comments