ന്യൂഡൽഹി: ദേശീയ ചലച്ചിത്ര പുരസ്കാര ദാന ചടങ്ങിൽ നാടൻപാട്ട് പാടി മലയാളത്തിന്റെ അഭിമാനം നഞ്ചിയമ്മ. ഏറ്റവും മികച്ച ഗായികയ്‌ക്കുള്ള പുരസ്കാരം ഏറ്റുവാങ്ങിയ ശേഷമായിരുന്നു നഞ്ചിയമ്മയുടെ പാട്ട്. ദാദാസാഹെബ് ഫാൽക്കെ പുരസ്കാര ജേത്രി ആശാ പരേഖിനൊപ്പമിരുന്നാണ് നഞ്ചിയമ്മ പാടിയത്.
#WATCH | Nanjiyamma, who won the National Award for Best Female Playback Singer, sings before Dadasaheb Phalke Awardee Asha Parekh, Union Ministers Anurag Thakur-L Murugan and others.
Nanjiyamma, who is also a folk singer, hails from a small tribal community in Kerala. pic.twitter.com/6tPvKp3ume
— ANI (@ANI) September 30, 2022
പുരസ്കാരത്തിന് അർഹയാക്കിയ ‘അയ്യപ്പനും കോശിയും‘ എന്ന ചിത്രത്തിലെ ഗാനമാണ് നഞ്ചിയമ്മ ആശാ പരേഖിന് വേണ്ടി പാടിയത്. നഞ്ചിയമ്മ പാടുന്ന വീഡിയോ പുറത്ത് വന്നിട്ടുണ്ട്. നഞ്ചിയമ്മയുടെ പാട്ട് കേട്ട് സംഘാടകരും കേന്ദ്രമന്ത്രിമാരും അടക്കം അടുത്തേക്ക് വരുന്നതും കൈയ്യടിച്ച് താളം പിടിക്കുന്നതും വീഡിയോയിൽ കാണാം. ഒട്ടും പരിഭ്രമിക്കാതെ തനത് ഭാവത്തിൽ പാട്ടുപാടി പുഞ്ചിരിക്കുന്ന നഞ്ചിയമ്മയ്‌ക്ക് ആശാ പരേഖും കേന്ദ്ര മന്ത്രിമാരായ അനുരാഗ് ഠാക്കൂറും എൽ മുരുഗനും നന്ദി പറയുന്നതും വീഡിയോയിൽ കാണാം.
നഞ്ചിയമ്മ പാടുന്ന വീഡിയോ കേന്ദ്ര മന്ത്രി അനുരാഗ് ഠാക്കൂർ ഉൾപ്പെടെയുള്ളവർ സാമൂഹിക മാദ്ധ്യമങ്ങളിൽ പങ്കുവെച്ചിട്ടുണ്ട്. നേരത്തേ, രാഷ്‌ട്രപതി ദ്രൗപദി മുർമുവിൽ നിന്നും മികച്ച ഗായികയ്‌ക്കുള്ള പുരസ്കാരം ഏറ്റുവാങ്ങിയപ്പോൾ എഴുന്നേറ്റ് നിന്ന്, കരഘോഷത്തോടെയാണ് സദസ്സ് നഞ്ചിയമ്മയെ ആദരിച്ചത്.
