മോഷ്ടിക്കാൻ കയറിയത് അഞ്ച് വീടുകളിൽ ; ഏലയ്‌ക്കാ ചായ കുടിച്ച് സാധനങ്ങൾ അടിച്ച് തർത്തു ; പ്രതിക്കായി അന്വേഷണം ആരംഭിച്ച് പോലീസ്

പത്തനംതിട്ട : വീട്ടുപകരണങ്ങൾ അടിച്ച് തകർത്ത് മോഷ്ടാക്കൾ. അടൂർ സ്വദേശി അറപ്പുരയിൽ ഗീവർഗീസ് തോമസിന്റെ വീട്ടിലെ സാധനങ്ങളാണ് മോഷ്ടാക്കൾ അടിച്ച് തകർത്തത്. ഇതിന് പുറമെ സമീപത്തെ നാല് വീടുകളിലും മോഷണശ്രമം നടന്നിട്ടുണ്ട്.
അടൂർ കരുവാറ്റ വട്ടമുകളിൽ സ്റ്റീവ് വില്ലയിൽ അലീസ് വർഗീസ്, മറ്റത്തിൽ രാജ് നിവാസിൽ ലില്ലിക്കുട്ടി, മൻമോഹൻ വീട്ടിൽ രമാദേവി, അഷ്ടമിയിൽ സുഭാഷ് സുകുമാരൻ എന്നിവരുടെ വീടുകളിലാണ് മോഷണശ്രമം നടന്നത്.

മുൻവാതിൽ കുത്തിതുറന്നാണ് മോഷ്ടാക്കൾ ഉള്ളിൽ പ്രവേശിച്ചത്. ഈ വീടിന്റെ കിച്ചൺ ക്യാബ്, തടി അലമാര, ഷോക്കേസ് എന്നിവയാണ് നശിപ്പിച്ചത്. രണ്ടുമാസം മുൻപാണ് ഈ വീടിന്റെ ഗൃഹപ്രവേശന ചടങ്ങ് നടന്നത്. അതിനാൽ വീട്ടിൽ സാധനങ്ങൾ ഒന്നും തന്നെ ഉണ്ടായിരുന്നില്ല. എന്നാൽ അടുക്കളയിൽ എത്തി ഏലയ്‌ക്കാ ചായ ഉൾപ്പെടെ ഇട്ട് കുടിച്ചതിന് ശേഷമാണ് മോഷ്ടാക്കൾ സാധനങ്ങൾ നശിപ്പിച്ചത്.

ഇതിന് പുറമെ മറ്റത്തിൽ രാജ്നിവാസ് എന്ന വീടിന് മുന്നിലെ രണ്ട് ക്യാമറകൾ നശിപ്പിച്ചു. വീട്ടുടമസ്ഥർ ഈ സമയം തിരുവനന്തപുരത്തായിരുന്നു. ദൃശ്യങ്ങൾ ക്യാമറയിലൂടെ അവർക്ക് ലഭിച്ചു. വെള്ളിയാഴ്ച പുലർച്ചെ 2.44 വരെ ക്യാമറയിൽ നിന്നും ദൃശ്യങ്ങൾ ലഭിച്ചിരുന്നു. പിന്നാലെ ക്യാമറ ശ്രദ്ധയിൽപ്പെട്ട മോഷ്ടാക്കൾ അത് നശിപ്പിക്കുകയും ചെയ്തു. വെള്ളിയാഴ്ച പുലർച്ചെ 3.40-വരെ അടുക്കളയിൽ വെളിച്ചം ഉണ്ടായിരുന്നതായി വീടിന് പുറക് വശത്തെ ക്യാമറയിൽ നിന്നും മനസ്സിലാകുന്നുണ്ട്. ഈ വീട്ടിലെ അടുക്കളയിൽ നിന്നാണ് പാത്രം എടുത്ത് മോഷ്ടാക്കൾ ഏലക്കാ കാപ്പിയിട്ട് കുടിച്ചത്.സിറ്റൗട്ടിൽ കാപ്പി കുടിച്ച ഗ്ലാസും ഇരിപ്പുണ്ടായിരുന്നു. അടൂർ പോലീസും വിരലടയാള വിദഗ്‌ദ്ധരും സ്ഥലത്തെത്തി പരിശോധന നടത്തി.