ലാഹോർ: പാകിസ്താൻ ക്രിക്കറ്റ് ബോർഡിനെതിരെ വിവാദ പരാമർശം നടത്തിയ ബൗളിംഗ് കോച്ച് ഷോൺ ടെയ്റ്റിന്റെ മൈക്ക് ഓഫാക്കി പാക് ബോർഡ് പ്രതിനിധി. ടെയ്റ്റിന്റെ പരാമർശവും അത് തടയുന്ന പാക് ബോർഡ് പ്രതിനിധിയുടെ വീഡിയോയും സാമൂഹിക മാദ്ധ്യമങ്ങളിൽ ചിരി പടർത്തുകയാണ്.
ഇംഗ്ലണ്ടിനെതിരായ ട്വന്റി 20 പരമ്പരയിലെ ആറാം മത്സരത്തിൽ പാകിസ്താൻ ടീം പരാജയപ്പെട്ടിരുന്നു. നന്നായി തല്ല് വാങ്ങിയ പാക് ബൗളർമാരെ നിർദ്ദയം പ്രഹരിച്ചു കൊണ്ടേയിരുന്ന ഇംഗ്ലീഷ് ടീം, വെറും 14.3 ഓവറിൽ പാകിസ്താൻ ഉയർത്തിയ 170 റൺസ് വിജയലക്ഷ്യം അടിച്ചെടുത്തു. ഇതിന് ശേഷം നടന്ന വാർത്താ സമ്മേളനത്തിന് മുന്നോടിയായിട്ടായിരുന്നു ഷോൺ ടെയ്റ്റിന്റെ വിവാദ പരാമർശം.
Pakistan bowling coach Shaun Tait speaks to the media after the sixth T20I#PAKvENG | #UKSePK https://t.co/bS03Yp0WJf
— Pakistan Cricket (@TheRealPCB) September 30, 2022
‘തോറ്റിട്ട് വരുമ്പോഴും തല്ല് വാങ്ങിയിട്ട് വരുമ്പോഴും ഇവന്മാർ എന്നെ വാർത്താ സമ്മേളനത്തിന് അയയ്ക്കും‘ എന്നായിരുന്നു ടെയ്റ്റ് പറഞ്ഞത്. ഇതിനെ തുടർന്ന്, താങ്കൾ ശരിക്കും തയ്യാറാണോ എന്ന ചോദ്യവുമായി എത്തിയ പാകിസ്താൻ ബോർഡ് പ്രതിനിധി മൈക്ക് ഓഫാക്കി. താൻ റെഡിയാണ് എന്ന് ടെയ്റ്റ് പറഞ്ഞതോടെയാണ് വീണ്ടും മൈക്ക് ഓൺ ചെയ്തത്. പാകിസ്താൻ ക്രിക്കറ്റ് ബോർഡിന്റെ ഔദ്യോഗിക ട്വിറ്റർ അക്കൗണ്ടിൽ ഇപ്പോഴും നീക്കം ചെയ്യാതെ ഷെയർ ചെയ്യപ്പെടുകയാണ് ഈ വീഡിയോ.
മുൻ ഓസ്ട്രേലിയൻ പേസ് ബൗളറാണ്, നിലവിൽ പാകിസ്താൻ ടീമിന്റെ ബൗളിംഗ് പരിശീലകനായ ഷോൺ ടെയ്റ്റ്.
