മുംബൈ: റോഡ് സേഫ്റ്റി വേൾഡ് സീരീസിൽ ശ്രീലങ്ക ലെജൻഡ്സിനെ പരാജയപ്പെടുത്തി ചാമ്പ്യൻഷിപ്പ് നേടിയ ശേഷമുള്ള ഇതിഹാസ താരം സച്ചിൻ ടെണ്ടുൽക്കറുടെ കുറിപ്പ് സാമൂഹിക മാദ്ധ്യമങ്ങളിൽ വൈറൽ ആകുന്നു. ടൂർണമെന്റിൽ വിജയിച്ച ടീമിനെ സച്ചിൻ അഭിനന്ദിച്ചു. മത്സരത്തിൽ മികച്ച ബാറ്റിംഗ് പ്രകടനം കാഴ്ചവെച്ച നമൻ ഓജയ്ക്ക് അദ്ദേഹം പ്രത്യേക അഭിനന്ദനം അറിയിച്ചു. കിരീട നേട്ടം ടീം അംഗങ്ങൾക്കും ആരാധകർക്കും സമർപ്പിക്കുന്നതായി സച്ചിൻ അറിയിച്ചു. സച്ചിന്റെ ട്വീറ്റിന് വലിയ പിന്തുണയാണ് ലോകമെമ്പാടുമുള്ള ആരാധകരിൽ നിന്നും ലഭിക്കുന്നത്.
For India then, now & forever! 🇮🇳
A fantastic effort from the team to win the #RoadSafetyWorldSeries once again. The way @namanojha35 batted last night was simply brilliant.This is for all my teammates and amazing fans! 💙 pic.twitter.com/QAfnGlklkR
— Sachin Tendulkar (@sachin_rt) October 2, 2022
‘അന്നും ഇന്നും എന്നും ഇന്ത്യക്ക് വേണ്ടി. ഒരിക്കൽക്കൂടി ടീമിന്റെ തകർപ്പൻ പ്രകടനം നമുക്ക് റോഡ് സേഫ്റ്റി വേൾഡ് സീരീസ് നേടിത്തന്നിരിക്കുന്നു. നമൻ ഓജയുടെ ബാറ്റിംഗ് പ്രകടനം ഗംഭീരമായിരുന്നു. ഈ വിജയം എല്ലാ ടീം അംഗങ്ങൾക്കും ആരാധകർക്കും സമർപ്പിക്കുന്നു.‘ ഇതായിരുന്നു സച്ചിന്റെ ട്വീറ്റ്. മത്സരത്തിലെ വിവിധ ഘട്ടങ്ങളുടെ ചിത്രങ്ങളും ട്വീറ്റിൽ സച്ചിൻ ഉൾപ്പെടുത്തിയിട്ടുണ്ട്.
റോഡ് സേഫ്റ്റി വേൾഡ് സീരീസ് ഫൈനലിൽ ശ്രീലങ്ക ലെജൻഡ്സിനെ 33 റൺസിന് പരാജയപ്പെടുത്തിയാണ് ഇന്ത്യ ലെജൻഡ്സ് കിരീടം നേടിയത്. ടോസ് നേടി ബാറ്റിംഗ് തിരഞ്ഞെടുത്ത ക്യാപ്ടൻ സച്ചിൻ ടെണ്ടുൽക്കറെ പൂജ്യത്തിനും സുരേഷ് റെയ്നയെ 4 റൺസിനും പുറത്താക്കി കുലശേഖര ഇന്ത്യയെ ഞെട്ടിച്ചുവെങ്കിലും, പിന്നീട് ഒത്തു ചേർന്ന വിനയ് കുമാറും നമൻ ഓജയും ചേർന്ന് പോരാട്ടം ലങ്കൻ ക്യാമ്പിലേക്ക് നയിക്കുകയായിരുന്നു.
വിനയ് കുമാർ 36 റൺസുമായി പുറത്തായി. എന്നാൽ 71 പന്തിൽ 108 റൺസുമായി പുറത്താകാതെ നിന്ന ഓജ 20 ഓവറിൽ ഇന്ത്യൻ ടോട്ടൽ 195 റൺസിൽ എത്തിച്ചു.
മറുപടി ബാറ്റിംഗിൽ ശ്രീലങ്ക ലെജൻഡ്സിന് ഇതിഹാസ താരം സനത് ജയസൂര്യ ഉൾപ്പെടെയുള്ള താരങ്ങളെ തുടക്കത്തിലേ നഷ്ടമായി. കൃത്യമായ ഇടവേളകളിൽ വിക്കറ്റ് വീഴ്ത്തിയ ഇന്ത്യൻ ബൗളർമാർ ലങ്കയെ 12.1 ഓവറിൽ 85ന് 6 എന്ന നിലയിൽ എത്തിച്ചു. തുടർന്ന് ഒത്തു ചേർന്ന ഇഷാൻ ജയസൂര്യയും മഹേല ഉദവാട്ടേയും ചേർന്ന് മികച്ച കൂട്ടുകെട്ട് പടുത്തുയർത്തിയെങ്കിലും 33 റൺസ് അകലെ ലങ്കൻ പോരാട്ടം അവസാനിക്കുകയായിരുന്നു.
