തിരുവനന്തപുരം: തന്റെ പുതിയ ചിത്രമായ മേ ഹൂം മൂസയുടെ വിജയാഹ്ലാദം ആരാധകരുമായി പങ്കു വെച്ച് സൂപ്പർ താരം സുരേഷ് ഗോപി. ചിത്രം വൻവിജയമാക്കിയതിന് എല്ലാവർക്കും നന്ദി അറിയിക്കുകയാണെന്ന് അദ്ദേഹം പറഞ്ഞു. ഫേസ്ബുക്ക് ലൈവിലൂടെയായിരുന്നു സുരേഷ് ഗോപിയുടെ പ്രതികരണം.
ഒക്ടോബർ അഞ്ചാം തീയതി മുതൽ കേരളത്തിന് പുറത്തും ആറാം തീയതി മുതൽ ജിസിസി ഉൾപ്പെടെയുള്ള വിദേശ രാജ്യങ്ങളിലും ചിത്രം പ്രദർശനത്തിനെത്തുകയാണ്. സിനിമയുടെ പ്രൊമോഷനുമായി ബന്ധപ്പെട്ട് പറഞ്ഞ കാര്യങ്ങൾ ഫലവത്തായതിൽ സന്തോഷമുണ്ടെന്ന് അദ്ദേഹം പറഞ്ഞു. പനിയും ശാരീരികാസ്വാസ്ഥ്യങ്ങളും നിമിത്തം വിശ്രമത്തിലാണെന്നും സുരേഷ് ഗോപി കൂട്ടിച്ചേർത്തു.
പാപ്പൻ റിലീസ് ആയപ്പോൾ നടത്തിയത് പോലെ തിയേറ്ററുകളിൽ പ്രേക്ഷകരോടൊപ്പം നേരിട്ട് ആഹ്ലാദം പങ്കുവെക്കാൻ ആഗ്രഹമുണ്ട്. പ്രേക്ഷകരിൽ നിന്നും നേരിട്ട് അഭിപ്രായങ്ങൾ സ്വീകരിക്കാനുള്ള സംവിധാനം ഒരുക്കുമെന്നും സുരേഷ് ഗോപി പറഞ്ഞു.
തികഞ്ഞ രാജ്യസ്നേഹിയായ സൈനികൻ പൊന്നാനിക്കാരൻ മുഹമ്മദ് മൂസയായി സുരേഷ് ഗോപി നിറഞ്ഞാടുന്ന ചിത്രമാണ് ‘മേ ഹൂം മൂസ’. വെള്ളിമൂങ്ങ, മുന്തിരിവള്ളികൾ തളിർക്കുമ്പോൾ, ആദ്യരാത്രി, എല്ലാം ശരിയാകും എന്നീ ചിത്രങ്ങളുടെ സംവിധായകൻ ജിബു ജേക്കബാണ് മേ ഹൂം മൂസ ഒരുക്കിയിരിക്കുന്നത്. പൂനം ബാജ്വയാണ് ചിത്രത്തിലെ നായിക.
