ന്യൂഡൽഹി : മാംസാഹാരങ്ങൾ കഴിച്ചാൽ അമിതമായി വിയർക്കാറുണ്ടോ? കേൾക്കുമ്പോൾ ഇത് വിചിത്രമായി തോന്നാം. എന്നാൽ ഇത്തരം സംഭവങ്ങൾ അടിക്കടി ചിലരിൽ ഉണ്ടാകാറുണ്ട്. മാംസാഹാരം ധാരാളം കഴിച്ചാൽ ഉണ്ടാകുന്ന മീറ്റ് സ്വെറ്റ്സ് എന്ന അവസ്ഥയാണിത്.
എന്തുകൊണ്ടാണ് ഇത്തരമൊരു അവസ്ഥ ഉണ്ടാകുന്നത് ?
മാംസം ധാരാളമായി കഴിച്ചാൽ അതിന്റെ ദഹനപ്രക്രിയയ്ക്കായി കൂടുതൽ ഊർജ്ജം ആവശ്യമായി വരും. മാംസത്തിൽ കണ്ടുവരുന്ന പ്രോട്ടീനുകൾ തന്നെയാണ് ഇതിന് കാരണം. മാംസംകഴിക്കുമ്പോൾ ശരീരത്തിൽ ചൂട് വർദ്ധിക്കുന്നു. ശരീരത്തിന് ഒരേ സമയം നിശ്ചിത അളവിൽ പ്രോട്ടീൻ പ്രൊസസ് ചെയ്യാനുളള കഴിവേ ഉള്ളൂ. ഈ അളവിൽ കൂടുതലായാൽ പോഷകങ്ങളുടെ ആഗിരണത്തെ അത് ബാധിക്കും, ഭക്ഷണം ദഹിക്കാനും വൈകും.
ഈ അവസ്ഥയെ എങ്ങനെ ഇല്ലാതാക്കാം ?
അമിതമായി മാംസം കഴിക്കുന്നതും ശരീരം അനക്കാതെ ഒരേ ഭാഗത്ത് ഇരിക്കുന്നതുമാണ് ഇതിന്റെ പ്രധാന കാരണങ്ങൾ. സുഗമമായ ദഹനത്തിനായി വ്യായാമങ്ങളോ മറ്റോ ചെയ്യുക എന്നതാണ് ഈ അവസ്ഥ നേരിടാനുള്ള പ്രതിവിധി. ഒരു സമയം ആറ് ഔൺസിൽ കൂടുതൽ മാംസം കഴിക്കാതിരിക്കാനും ശ്രദ്ധിക്കണം.
ഭയം വേണ്ട
ഈ അവസ്ഥയെക്കുറിച്ച് നാം ഭയപ്പെടേണ്ടതില്ല. എന്നാൽ ഇത് അടിക്കടി സംഭവിക്കുകയാണെങ്കിൽ ഭക്ഷണത്തിൽ ക്രമം വരുത്തണം. ഒരു ആരോഗ്യവിദഗ്ധനെ കാണുന്നതും നല്ലതാണ്. പ്രോട്ടീൻ അമിതമായി കഴിച്ചാൽ പ്രോട്ടീൻ വിഷബാധ ഉണ്ടാകാനുള്ള സാധ്യതകളും ഏറെയാണ്. ഒരു കിലോ ഭാരത്തിൽ ഒരു ഗ്രാം പ്രോട്ടീനിന്റെ അംശം മാത്രമേ ഉണ്ടാകാൻ പാടുള്ളൂ.
