ഐസ്ക്രീം കഴിക്കാൻ ഇഷ്ടപ്പെടാത്തവരായി ആരുണ്ട്.. കുട്ടികൾ മുതൽ മുതിർന്നവർ വരെ പ്രായഭേദമന്യേ ആളുകൾക്ക് ഐസ്ക്രീം ഇഷ്ടമാണ്. തണുപ്പും മധുരവും ഒരേസമയം കിട്ടുന്നതിനാൽ വേനൽക്കാലത്ത് പലരും ഐസ്ക്രീം പതിവായി കഴിക്കാറുണ്ട്.. എന്നാൽ ഐസ്ക്രീം ഇഷ്ടമാണെങ്കിലും അത് കഴിക്കാതെ ഒഴിവാക്കുന്ന ചിലരും നമുക്കിടയിലുണ്ട്. കഴിച്ചയുടനെ ശബ്ദം പോകുന്നവരും തൊണ്ട ഇടറുന്നവരും കഫക്കെട്ടും പനിയും വരുന്നവരും ആണ് ഇക്കൂട്ടർ. ഇത്തരക്കാർ ഈ പ്രശ്നങ്ങളെ ഭയന്ന് ഐസ്ക്രീം തൊടുകയില്ല. ഇഷ്ടമാണെങ്കിലും ആരോഗ്യ പ്രശ്നങ്ങളെ പരിഗണിച്ചാണ് ഇത്തരത്തിൽ ഐസ്ക്രീം വേണ്ടെന്ന് വെയ്ക്കുന്നത്.
ചിലരുടെ അന്നനാളവും തൊണ്ടയുമൊക്കെ വളരെയധികം സെൻസിറ്റീവ് ആയിരിക്കും. തണുപ്പേറിയ വിഭവങ്ങൾ കഴിക്കുമ്പോൾ ഇത്തരക്കാർക്ക് പെട്ടെന്ന് ഇൻഫെക്ഷൻ സംഭവിച്ചേക്കാം. തൊണ്ടവേദന വരുമെന്ന് കരുതി ഇവർ ഐസ്ക്രീം ഒഴിവാക്കുന്നു. ഇക്കൂട്ടർക്ക് പരീക്ഷിക്കാവുന്ന ചില നുറുങ്ങുവിദ്യകൾ നോക്കാം..
നിങ്ങൾ ഇഷ്ടപ്പെട്ട ഐസ്ക്രീം കഴിച്ചതിന് പിന്നാലെ ചെറുചൂടുള്ള വെള്ളം കുടിക്കുക. ചൂടുവെള്ളം ഊതിയൂതി കുടിച്ചാൽ തൊണ്ടയിൽ അണുബാധയുണ്ടാകുന്നതിനുള്ള സാധ്യത കുറയുന്നു. അതുവഴി തൊണ്ടയ്ക്ക് പ്രശ്നമുണ്ടാകാനുള്ള സാധ്യതയും ഇല്ലാതാകുന്നു.
ചൂടുവെള്ളം കുടിക്കുന്നതിന് പകരം മറ്റെന്തെങ്കിലും വിഭവങ്ങൾ കഴിച്ചാലും മതിയാകും. ഉദാഹരണമായി ഐസ്ക്രീം കഴിച്ചതിന് തൊട്ടുപിന്നാലെ ചോറ് അൽപം എടുത്ത് കഴിക്കാവുന്നതാണ്. രണ്ട് ഉരുള ചോറുണ്ടാലും അണുബാധയുണ്ടാകുന്നത് തടയാം. കറികളൊന്നും ചേർക്കാതെ തന്നെ ചോരുള കഴിക്കുന്നതാണ് നല്ലത്. അതുമല്ലെങ്കിൽ ചൂടുള്ള ചായ, കോഫി എന്നിവയും കുടിക്കാം.. എന്തായാലും ഐസ്ക്രീം കഴിച്ചയുടനെയാണ് ഇത് ചെയ്യേണ്ടത്.
നെല്ലിക്ക, ലൂബിക്ക തുടങ്ങിയ പുളിയുള്ള കായകൾ ഉപ്പിലിട്ടോ അല്ലാതെയോ ഒക്കെ കഴിക്കുന്നതും ഒരു പരിധി വരെ സഹായിക്കും. ഏതായാലും ഡോക്ടറുടെ നിർദേശത്തെ തുടർന്ന് ഐസ്ക്രീം ഒഴിവാക്കിയ ആളുകൾ ആണെങ്കിൽ ഈ സൂത്രവിദ്യകൾ പരീക്ഷിക്കാനുള്ള അനുവാദം ചോദിച്ചതിന് ശേഷമേ ചെയ്യാവൂ..
