വിമാനത്തിൽ കയറ്റാൻ സാധിക്കില്ലെന്ന് പറഞ്ഞ് പല സാധനങ്ങളും വിമാനത്താവളത്തിൽ തന്നെ ഉപേക്ഷിക്കുന്നവരാണ് ഭൂരിഭാഗവും. ഇതിൽ കൂടുതലും ഭക്ഷണസാധനങ്ങളായിരിക്കും. ലഗേജിന്റെ ഭാരക്കൂടുതൽ കാരണം സാധനങ്ങൾ ഉപേക്ഷിച്ച് പോകുന്നവരുമുണ്ട് ഇക്കൂട്ടത്തിൽ. എന്നാൽ ഇത്തരത്തിൽ ഭക്ഷ്യസാധനങ്ങൾ ചവറ്റുകൊട്ടയിലേക്ക് എറിയേണ്ട ആവശ്യമില്ലെന്ന് നമ്മെ പഠിപ്പിക്കുകയാണ് ഇന്ത്യൻ വംശജനായ ഒരു യുവാവ്. തന്റെ കൈയ്യിലുള്ള മധുരം വിമാനത്താവളത്തിലെ ആളുകളുമായി പങ്കുവെച്ചാണ് ഹിമാൻഷു ദേവ്ഗൺ എന്ന യുവാവ് സ്നേഹം പ്രകടിപ്പിച്ചത്.
തായ്ലാന്റിലെ ഫുക്കേറ്റ് വിമാനത്താവളത്തിലാണ് സംഭവം. ഗുലാബ്ജാമുനുമായി വിമാനത്താവളത്തിൽ എത്തിയപ്പോഴാണ് ഇത് വിമാനത്തിൽ കയറ്റില്ലെന്ന കാര്യം അദ്ദേഹം അറിയുന്നത്. എന്നാൽ കൈയ്യിൽ കരുതിയ മധുരപലഹാരം എടുത്ത് കളയാൻ ദേവ്ഗൺ തയ്യാറായില്ല.
അയാൾ ആ പലഹാരം വിമാനത്താവളത്തിലെ ജീവനക്കാർക്ക് തന്നെ വിതരണം ചെയ്യുകയാണ് ചെയ്തത്. സുരക്ഷാ ജീവനക്കാർ ഇത് നിഷേധിച്ചെങ്കിലും പിന്നീട് മധുരം സ്വീകരിച്ചു. ഇവരത് ആസ്വദിച്ച് കഴിക്കുന്നതിന്റെ വീഡിയോയും കാണാനാകും. സുരക്ഷാ ജീവനക്കാരോട് ഇദ്ദേഹം നമസ്തേ എന്ന് പറയാനും ആവശ്യപ്പെടുന്നുണ്ട്. അവരത് പറയുന്നതും വീഡിയോയിൽ കാണാനാകും.
”ഗുലാബ് ജാമുനുമായി വിമാനത്തിൽ കയറാൻ അവർ സമ്മതിച്ചില്ല. അതുകൊണ്ട് അവരുമായി മധുരം കഴിച്ച് സന്തോഷം പങ്കുവെയ്ക്കാൻ തീരുമാനിച്ചു” എന്ന ക്യാപ്ഷനോടെയാണ് വീഡിയോ പങ്കുവെച്ചിരിക്കുന്നത്.
വീഡിയോയ്ക്ക് മികച്ച പ്രതികരണങ്ങളാണ് ലഭിക്കുന്നത്. യുവാവിന്റേത് മികച്ച പ്രവൃത്തിയാണെന്നും ഇത്തരം കാര്യങ്ങൾ എല്ലാവർക്കും സന്തോഷം നൽകുമെന്നുള്ള കമന്റുകളാണ് ലഭിക്കുന്നത്.
