മുംബൈ: ലഹരി കടത്തുമായി ബന്ധപ്പെട്ട് മുംബൈയിൽ വീണ്ടും മലയാളി അറസ്റ്റിൽ. വിമാനത്താവളത്തിലൂടെ കടത്താൻ ശ്രമിച്ച 80 കോടി രൂപയുടെ ഹെറോയിൻ ഡിആർഐ പിടിച്ചെടുത്തു. മലയാളിയായ ബിനു ജോൺ ആണ് ലഹരി കടത്താൻ ശ്രമിച്ചത്. ഇയാളെ ഡിആർഐ അറസ്റ്റ് ചെയ്തു. 16 കിലോ ഹെറോയിൻ ആണ് ഇയാളിൽ നിന്ന് പിടിച്ചത്.
1476 കോടി രൂപയുടെ ലഹരി കടത്തിൽ ഇന്നലെ മലയാളിയായ വിജിൻ വർഗീസിനെ ഡിആർഐ അറസ്റ്റ് ചെയ്തിരുന്നു. ഓറഞ്ചുകൾക്കിടയിൽ ഒളിപ്പിച്ചാണ് 1476 കോടിയുടെ മെത്തും കൊക്കെയ്നും മുംബൈ തുറമുഖം വഴി കടത്തിയത്. വിജിൻ ഉടമയായ കമ്പനിയുടെ പേരിലാണ് ലഹരി എത്തിയത്. പഴം ഇറക്കുമതിയുടെ മറവിലാണ് രാജ്യത്തേക്ക് വൻ തോതിൽ ലഹരി മരുന്ന് ഇറക്കുമതി ചെയ്തത്. കേസിലെ മറ്റൊരു പ്രതിയായ മോർ ഫ്രഷ് എക്സ്പോർട്സ് ഉടമ തച്ചാപറമ്പൻ മൻസൂറിനായി അന്വേഷണം ആരംഭിച്ചു. വിജിന്റെ കൂട്ടാളിയാണ് ഇയാൾ. ലഹരിക്കടത്തിൽ 70 ശതമാനം ലാഭം വിജിനും 30 ശതമാനം മൻസൂറിനുമെന്ന തരത്തിലാണ് ഡീൽ ഉറപ്പിച്ചിരുന്നതെന്ന് ഡിആർഐ വ്യക്തമാക്കി.
ദക്ഷിണാഫ്രിക്കയിൽ നിന്ന് മുംബൈ തുറമുഖം വഴി കപ്പലിലാണ് ലഹരി കടത്തിയത്. രാജ്യത്തെ ഏറ്റവും വലിയ ലഹരിവേട്ടകളിൽ ഒന്നാണ് ഇതെന്ന് ഡിആർഐ വ്യക്തമാക്കി. സംഭവവുമായി ബന്ധപ്പെട്ട് വിജിൻ ഡയറക്ടറായ യമ്മിറ്റോ ഇന്റർനാഷണൽ ഫുഡ്സിന്റെ കാലടിയിലെ ഓഫീസിൽ എക്സൈസ് ഇന്നലെ പരിശോധന നടത്തിയിരുന്നു. നേരത്തെ മാസ്ക് ഇറക്കുമതിയും സ്ഥാപനം നടത്തിയിരുന്നു. ഇതിന്റെ മറവിലും ലഹരിക്കടത്ത് നടന്നോയെന്ന് പരിശോധിക്കുകയാണ്.
